Անցյալ տարի գարնանը Արտուշ Թորոյանի բակում կառուցված պատնեշը, որն անջատում է տունը վարար ջրատարից, արդեն որերորդ անգամ փլուզվեց: Տնից ջրատար, Արտուշի խոսքով, մոտ 6 մետր է եւ եթե գետը վարար է լինում ջրերը աստիճաններին են հասնում, անգամ տան մուտքն են ողողում: Ջրատարի հետ միասին նաեւ տան աստիճանների մի հատվածն է փլուզվել: Ջրատարը ջուրը մատակարարում է Վայքի այգիներին եւ որ ամենակարեւորն է՝ «Ազատեկ» ՀԷԿ-ին: Ամեն տարի ջրատարը նյութական մեծ վնասներ է հասցնում Արտուշ Թորոյանի ընտանիքին: Եթե նյութական վնասներն ինչ-որ առումով վերականգնելի են, ապա երեխայի կորուստն այս ընտանիքի համար անդառնալի է: Արտուշի մեկ տարեկան որդին անցյալ տարի ընկել է ջրատարն ու խեղդվել: Արդեն 7-8 տարի է Արտուշը դիմում է կառավարությանը, տարածքային կառավարման եւ ենթակառուցվածքների նախարարություն, Ջրային պետական կոմիտեին, Վայոց Ձորի մարզպետարան, Վայքի քաղաքապետարան: Նամակները պտտվում-պտտվում վերադառնում են Վայքի քաղաքապետարան: Այստեղից էլ ասում են՝ միջոցներ չունենք:
Արտուշ Թորոյանը զինծառայող է: Եվ շատ հաճախ սահմանին, մարտական հերթապահության է լինում, երբ ընտանիքի անդամները զանգում են եւ վատ լուրը հայտնում՝ ջուրը կրկին բակ է լցվել, պատնեշը՝ փլուզել: Արտակարգ իրավիճակների նախարարությունը տեղում խնդիրն ուսումնասիրել է եւ հայտնել՝ ոչինչ չեն կարող անել: Հերթական փլուզումից հետո Արտուշն իր ուժերով փորձել է այն վերանորոգել, բայց կոսմետիկ վերանորոգումն, ըստ նրա, հարցի լուծում չէ, հիմնավոր պատ կառուցելու համար էլ միջոցներ չունի: Արտուշ Թարոյանի տունը Վայքի Ջերմուկի խճուղում է, այս շարքի վրա էլի տներ կան, որոնք նույն խնդիրն ունեն: Արտուշի խոսքով, եթե ջուրը ՀԷԿ-ի համար է օգտագործվում, ապա դրա սեփականատերը պարտավոր է բնակիչների անվտանգության համար միջոցներ ձեռնարկել: Տան պատերն արդեն այնքան են խոնավացել, բորբոսնել ու ճաքեր տվել, որ նույնպես փլուզման վտանգի տակ են:
«Չեմ ասում՝ եկեք իմ տունը վերանորոգեք, ընդամենն ուզում եմ ջրատարի հարցը լուծեք, որ իմ տանը վնաս չպատճառի: Այս տարի նորից փլվել է, հավաքել եմ, փորձել եմ առավելագույնս անվտանգություն ստեղծել: Երեք անչափահաս երեխա ունեմ: Ում զանգում եմ, ասում են՝ միջոցներ չկա, որ լինի կանենք: Ասում եմ՝ ուրեմն ջուրը կտրեք, ինձ պատասխանում են՝ եթե կտրենք, Վայքը ոռոգման ջրի խնդիր կունենա: Ուրեմն ՀԷԿ-ի սեփականատերը թող բարի լինի վերանորոգի, գոնե մեր տան հատվածը, քանի որ այդ ջուրն իր ՀԷԿ-ն է գնում»:
Արտուշի խոսքով, վերջին դիմումը մոտ վեց ամիս առաջ է կրկին ուղարկել՝ մարզպետարան, Վայքի քաղաքապետարան, անգամ վարչապետին է անձամբ նամակ հանձնել: Քաղաքապետարանից պատասխան է ստացել՝ միջոցներ չունեին, բայց արդեն գտել են եւ շուտով կվերանորոգեն, սակայն դրանից էլ եւս 4-5 ամիս է անցել, բայց գործնական որեւէ քայլ չկա: Իսկ ջրատարը կրկին վարարել է ու մինչեւ տուն բարձրացել:
Կարդացեք նաև
«Առավոտը» Վայքի քաղաքապետարանից տեղեկացավ, որ Արտուշ Թորոյանի հարցը հենց երեկ քաղաքապետի մոտ դրվել է քննարկման: Մեզ հետ զրույցում Վայքի քաղաքապետարանից հայտնեցին, որ նիստը տեւել է մի քանի ժամ, իսկ թե ինչ են որոշել Արտուշ Թորոյանի հարցով, կհրապարակենք առաջիկայում:
Լուսինե ԲՈՒԴԱՂՅԱՆ
«Առավոտ» օրաթերթ
04.06.2020
