Արդարադատության նախարարը`ոստիկանության բարեփոխումների եւ պարեկային ծառայության մասին
ՀՀ արդարադատության նախարար Ռուստամ Բադասյանն այսօր, ֆեյսբուքյան ուղիղ եթերում ներկայացրեց ոստիկանության բարեփոխումները, մասնավորաբար, ստեղծվելիք պարեկային ծառայության մասին մանրամասն տեղեկություններ տվեց: Նախարարը հորդորեց քաղաքացիներին ակտիվ լինել եւ դիմել ոստիկանության նոր ծառայությունում աշխատանքի անցնելու համար:
Ասաց` մոտ 400 հետաքրքրված անձ կա պարեկային ծառայությունում աշխատանքի անցնելու, թեեւ դեռ ընդունելության մասին հայտարարությունները տեղադրված չեն: Զանգեր եղել են արդարադատության նախարարություն: Շատ մեծ հետաքրքրություն են ցուցաբերում կանայք: Նրա կարծիքով, պարեկային ծառայությունում աշխատանքի անցնելու համար միջնակարգ կրթությունը բավարար է, որպեսզի ավելի շատ կադրային բազա կարողանան ապահովել:
Իսկ ոստիկանությունում աշխատանքը պետք է սկսել հենց այդ ծառայությունից, որպեսզի ժամանակ լինի ոստիկանության ակադեմիայում մասնագիտական վերապատրաստումներ անցնել`այլ ստորաբաժանումներ աշխատանքի անցնելու համար. օրինակ, կլինի կրիմինալ ոստիկանություն, հետագայում նաեւ քննչական մարմին եւ այլն: Պարեկային ծառայությունում աշխատանքի հնարավոր կլինի անցնել հնգամսյա դասընթացներից հետո: Այդ ընթացքում, ըստ նախարարի, հնարավոր կլինի ստանալ մասնագիտական եւ ֆիզիկական պատրաստվածություն, կրակային պատրաստվածություն, առաջին բուժօգնություն ցուցաբերելու դասընթաց:
Կարդացեք նաև
250-270 հազար դրամ կսահմանվի կրտսեր պարեկների աշխատավարձը: Ավագ պարեկները կստանան ավելի բարձր: Աշխատավարձի բարձրացումը եւ ոստիկանության այլ ծառայություններ աշխատանքի փոխադրվելը նախարարը երաշխավորվում է: Ընդունելության մրցույթն էլ խոստանում է, արդար է լինելու: Առավելություն կտրվի մասնագիտական ունակությունների զատ նաեւ «ոստիկանի նոր արժեքային համակարգում» ծառայելու պատրաստակամ անձանց:
Պարեկային ծառայությունն ապահովված է լինելու նոր մեքենաների պարկով եւ անհրաժեշտ այլ տեխնիկական միջոցներով:
Նելլի ԳՐԻԳՈՐՅԱՆ
