Ամերիկացի սենատոր Բոբ Մենենդեզը պաշտոնապես դիմել է Կառավարության հաշվետու գրասենյակ (GAO)՝ խնդրելով ԱՄՆ Սենատի արտաքին հարաբերությունների կոմիտեին տրամադրել մանրամասն հաշվետվություն՝ Միացյալ Նահանգների կողմից Ադրբեջանին տրամադրվող ռազմական օգնության վերաբերյալ, որի չափը վերջին 3 ֆիսկալ տարում գերազանցել է 120 միլիոն ԱՄՆ դոլար: Այս մասին հաղորդում է ԱՄՆ Հայ դատի հանձնախումբը:
Սենատորը GAO-ին խնդրել է անդրադառնալ մի շարք հարցերի, մասնավորապես՝ որն է Ադրբեջանի կառավարությանը հատկացվող աջակցության բնույթը, որքանով համատեղելի է 907-րդ հոդվածի հետ, Կոնգրեսին նախապես տեղեկացրել են Բաքվին տրամադրվող աջակցության մասին, թե ոչ, կան տվյալներ այն մասին, որ Ադրբեջանն այդ օգնությունն ուղղակի կամ անուղղակի օգտագործել է հարձակողական նպատակով Հայաստանի կամ Լեռնային Ղարաբաղի վրա, թե ոչ:
Հիշեցնենք, որ 907-րդ բանաձևը Կոնգրեսի կողմից ընդունվել է 1992թ. ու ամերիկյան վարչակազմին արգելում է պետական մակարդակով օգնություն տրամադրել Բաքվին՝ հաշվի առնելով Հայաստանի ու Ադրբեջանի միջև հակամարտությունը, քանի դեռ ԱՄՆ նախագահը չի զեկուցել Կոնգրեսին, որ պաշտոնական Բաքուն քայլեր է ձեռնարկում Հայաստանի ապաշրջափակման համար և ուժ չի կիրառում Հայաստանի և Լեռնային Ղարաբաղի դեմ:
Պատրաստեց՝ Վիկտորյա ԱՆԴՐԵԱՍՅԱՆԸ
