«2019-ի հունվարի 1-ի դրությամբ, երբ Հայաստան ներկրվող գազի սակագինը դարձավ 165 դոլար, մենք գազը շարունակեցինք վաճառել 255 դոլարով: Այդ 90 դոլարից մոտ 43 դոլարը վճարում ենք բյուջե՝ համարվելով առաջին հարկատու: 47 դոլարից 12-ը կորուստ է: 35 դոլարից 19-ն աշխատավարձն է: «Գազպրոմ Արմենիային» մնում է 16 դոլար»,-այսօր Հանրային ծառայությունները կարգավորող հանձնաժողովի նիստում, որտեղ քննարկվում էր «Գազպրոմ Արմենիայի»՝ սակագնի բարձրացման հայտը, ասաց ընկերության գլխավոր տնօրեն Հրանտ Թադեւոսյանը: Նրա խոսքով, այսպես անհնար է պահել համակարգը, անհրաժեշտ են նորմատիվ ծախսեր:
Ըստ Հրանտ Թադեւոսյանի, իրենց հիմնական խնդիրն է՝ հավասարակշռել սպառողների եւ մատակարարի շահերը, որպեսզի ունենանք հուսալի եւ անվտանգ գազամատակարարում՝ հակառակ դեպքում կլինեն գազամատակարարման խնդիրներ: Ըստ նրա, խնդիրները կապված են փոխադրման համակարգի մաշվածության հետ:
«Պետք է իրականացնենք անհրաժեշտ նորմատիվ ծախսեր, որոնք մինչեւ այժմ չեն արվել»,-ասաց ընկերության տնօրենը՝ պարզաբանելով, որ գազի 1000 խորանարդ մետրի դիմաց առաջարկված 275 դոլար գնով ընկերությունը նախատեսում է 10 տարում ունենալ 60 միլիարդ դրամի մարժա եւ զուգահեռ իրականացնել 230 միլիարդ դրամի ներդրումներ, առանց որոնց ապագայում կարող են առաջանալ մատակարարումների հետ կապված խնդիրներ, ինչը չի եղել կանոնավոր մատակարարումների պահից սկսած՝ 1997 թվականից:
Տնօրենը նաեւ ասաց, որ «Գազպրոմ Արմենիա» ընկերությունում միջին աշխատավարձը կազմում է 277 000 դրամ. «Ընկերության տնօրենը 20 միլիոն դրամ չի ստանում , ինչպես գրում են ԶԼՄ-ներում, այլ ավելի քիչ, սակայն նույնիսկ, եթե դա այդպես լիներ, ապա որեւէ խնդիր չէր լինի, եթե այդպիսով օրենք չխախտվեր»:
Կարդացեք նաև
Հիշեցնենք, որ այս տարվա ապրիլի 1-ին «Գազպրոմ Արմենիան» դիմել էր ՀԾԿՀ՝ գազի սակագինը վերանայելու հայտով: Ընկերությունն առաջարկում է բնակչությանը մատակարարվող գազի սակագինը բարձրացնել 36 տոկոսով:
Լուսինե ԲՈՒԴԱՂՅԱՆ
