«Բիթլզի» հիմնադիրներից լեգենդար երաժիշտ Ջոն Լենոնը ժամանակին խենթի պես սիրահարվեց Ֆլորիդային ու այնտեղ որոշեց անկյուն ունենալ իր եւ Յոկոյի համար:
Նրանց սիրո բույնը Փալմ Բիչում էր:
kulrurologia.ru-ն պատմում է, թե լիվերպուլյան խուլիգանի ու ճապոնացի նրբաճաշակ արիստոկրատուհու միջեւ ինչ ընդհանուր բան կար, որ միմյանց կապեց հավիտյան:
Երկուսն էլ ըմբոստ էին ու սիրում էին էքսպերիմենտներ, նրանց սերը դուրս էր բոլոր ստանդարտներից ու կաղապարներից:
Կարդացեք նաև
Ջոն Լենոնը մի քիչ ձանձրանում էր նախկին կնոջ՝ համեստ ու խաղաղ Սինտիայի հետ, իսկ Յոկոն լրիվ տարբերվում էր Սինտիայից:
Նա օժտված էր Ջոնին դաստիարակած մորաքույր, խստապահանջ ուսուցչուհի Միմիին ու նրա մորը բնորոշ ակտիվությամբ:
Յոկոն գրավել էր Լենոնին, «բիթլի» համար նա աշխարհի ամենահետաքրքիր կինն էր, դրա համար էլ բաժանվեց կնոջից ու լքեց որդուն: Այս զույգի կյանքը լեցուն էր բողոքներով, սկանդալներով, ու այս ամենը թերթերի առաջին էջերում էր հայտնվում:
Հետագայում նրանք տարածք ձեռք բերեցին Ֆլորիդայում:
Էլ Սոլանո կոչվող այդ տարածքը կես հեկտար մակերես ուներ:
Այն յոթ ննջարան ու հսկա ընդունելության սրահ ուներ, թենիսի հրապարակ, օվկիանոսի ափին զրուցարան, բազմաթիվ հարմարություններ:
Միջերկրածովային եւ իսպանական ոճով դղյակը կառուցվել էր 1952 թվականին, ճարտարապետն էլ Ադիսոն Մինզերն էր:
Դղյակը զույգը գնեց Լենոնի մահից քիչ առաջ՝ 1980թ.:
Այդտեղ ըմբոստ ռոք աստղը վերածվել էր խաղաղ ընտանեսեր մարդու, ինչը դուր չէր գալիս նրա որոշ երկրպագուների: 1980 թվականի դեկտեմբերի 8-ին Ջոն Լենոնը սպանվում է Մարկ Չեմպենի կողմից:
Չեմպենի համար Լենոն ուղղակի աստված էր, նա ամեն ինչով փորձում էր նմանվել Լենոնին, նույնիսկ ամուսնացել էր տարիքով իրենից մեծ ճապոնուհու հետ: Այս մոլագարի շնորհիվ, սակայն, մահից հետո էլ Լենոնը ձեռք բերեց անմահություն:
«Ես մտածում էի, որ եթե սպանեմ նրան, կհռչակվեմ»,-ասել էր Մարկ Չեմպենը՝ ամերիկացի հեռուստալրագրող Բարբարա Ուոլթերսին տված հարցազրույցում: Չեմպենը հոգեկան խանգարման պատճառով անցկացրել էր նաեւ հոգեբուժարանում: Նա չորս-հինգ կրակոց էր արձակել Լենոնի վրա՝ հենց տան մուտքի մոտ, նա փախուստի չէր դիմել դեպքի վայրից: Այն պահին, երբ ոստիկանությունը մոտեցել էր ձերբակալելու մարդասպանին, Չեմպենը կարդում էր Սելինջերի «Տարեկանի արտում՝ անդունդի եզրին» գիրքը: Նա հայտարարել էր, որ Լենոնն իր նմանակն է, ինքն է իսկական Ջոն Լենոնը:
Լենոնի մահից հետո Յոկո Օնոն վերանորոգեց դղյակը ու այն վաճառեց 1986թ.: Այսօր նախկին «բիթլի» դղյակն արդեն աստղաբաշխական գին ունի՝ չնայած համաշխարհային տնտեսական ճգնաժամին: Այն այսօր էլ գնել ցանկացողների մեծ բանակ ունի:
Պատրաստեց ԳՈՀԱՐ ՀԱԿՈԲՅԱՆԸ
«Առավոտ» օրաթերթ
03.06.2020
