Ինչպես հայտնի է, Լոռու մարզում գործող «Գլորիա» կարի ֆաբրիկայի շուրջ աղմուկ է բարձրացել, վարչապետն էլ հրապարակել էր գերբեռնված ավտոբուսի նկարը, որը տեղափոխում էր այդ արտադրամասի աշխատակիցներին՝ խախտումներով, առանց սոցիալական հեռավորությունը պահելու:
Մենք այցելեցինք արտադրամաս: Մուտքի մոտ մեզ դիմավորեց պահակը ու հայտնեց, որ քիչ առաջ այնտեղ են եղել նաեւ մարզպետարանից: Ֆաբրիկայի գործունեությունը դադարեցված է մինչեւ հունիսի 6-ը: Արտադրամասի փոխտնօրեն Լեռնիկ Վարդանյանն ասաց, որ իրենք ունեն 2700 աշխատակից: Լուրեր կան, որ ֆաբրիկայում կա 36 վարակակիր աշխատակից, բայց փոխտնօրենը չհաստատեց դա՝ ասելով. «Առայժմ 14 են»:Հարցին՝ ամեն դեպքում շատ չի՞ այդ թիվը ձեր աշխատակազմում՝ նա արձագանքեց. «Իսկ հանրապետության մասշտաբով մեծ չի՞ թիվը, որ վարակվում են»:
Կարդացեք նաև
Լեռնիկ Վարդանյանը վստահեցրեց, որ իրենք պահել են պարետի կողմից հայտարարված բոլոր կանոնները. «Բայց դե որտեղից էր եկել ու ոնց՝ չեմ կարող ասել: Ոչ ոք ապահովագրված չի, որ չի կարող վարակվել»: Վարդանյանն ասաց, որ ինքը չի թեստավորվել, քանի որ այն արտադրամասում, որտեղ հայտնաբերվել է վարակը, այնտեղ չի աշխատել:
Հարցրեցինք՝ այս պահին քանի՞ աշխատակից կա շենքում, փոխտնօրենը պատասխանեց՝ զրո, մինչդեռ տարածքում տեսանելի էին առնվազն ինքն ու պահակը: Նա բացատրեց. «Գլխավոր տնօրենը իր կաբինետում է, պահակը պահակակետում է, ես էլ՝ փոխտնօրեն, ուղղակի պատահական մտա ներս»:
Հարցրեցինք՝ բա որ չի աշխատում ֆաբրիկան, ինչո՞ւ եք եկել, նա արձագանքեց. «Բա դո՞ւք ինչի եք ստեղ»: Բացատրեցինք՝ եկել ենք, որ լուսաբանենք, փոխտնօրենը հեգնեց. «Բա ես էլ այստեղ եմ, որ պատասխանեմ ձեզ, լուսաբանեմ»:
Ավելի ուշ նա բարկացավ ու հրահանգեց պահակին, որ մեզ գրանցամատյանում գրանցի ու «ստուգի». «Հրաման է, դե հիմա բերեք ստուգենք»:
Քիչ անց պատահական ներս մտան իտալացի մատակարարները: Փոխտնօրենը բացատրեց. «Ապրանք է բերել: Իտալիայում զանգում են, ասում են՝ մի՞ եկեք»:
Մտանք գլխավոր տնօրեն Բագրատ Դարբինյանի աշխատասենյակ: Տնօրենը դիմակ չէր կրել ու մեզ հարցազրույց էր տալիս, փակ սենյակում բացի իրենից կար 5 մարդ:
Իսկ նրա հետ հարցազրույցի մանրամասները՝ ավելի ուշ:
Հռիփսիմե ՋԵԲԵՋՅԱՆ
