ՀՀ ԱԺ «Իմ քայլը» խմբակցության պատգամավոր Սոս Ավետիսյանը վստահեցրեց՝ առցանց տարածքի և իրական կյանքի հարաբերությունները տարբեր են:
«Հոդված 3» ակումբի կազմակերպած «Ատելության խոսքը սոցիալական մեդիայում. հայաստանյան իրողություններ» թեմայով տեսաքննարկմանը պատգամավորն ասաց. «Երբ իմ երդումը տվեցի, հասկանում էի, որ կարող է շատ տհաճ բաներ լսեմ: Ոչ թե մարդու կրոնական կամ սեռական հատկանիշներով է թիրախավորումը լինում, այլ հանրային պաշտոնյային արդեն իսկ այդ խոցելի խմբի մեջ տեղադրված՝ մեղադրանք են հնչեցնում: Դա դառնում է գործիք: Այն ընդհանուր տեղեկատվական իրավիճակը, որ կա ՀՀ-ում, ունի լուրջ վտանգներ: Մինչդեռ հանրային համերաշխությունը երկրի անկախության ու արժանապատվության լավագույն հարթակն է»:
Սոս Ավետիսյանի վստահեցմամբ՝ ատելության խոսքը պետք է քրեականացնել և այն քրեականացվել է: Այս առիթով նա պարզաբանեց. «Բայց ինքն ունի կոնկրետ չափանիշներ. չափանիշները ենթադրում են, որ դա պետք է լինի հրապարակային, ուստի պետք է հասկանալ՝ հրապարակայինը որն է, այն պիտի լինի ուղղված կոնկրետ խոցելի խմբերի, խոցելի հատկանիշներով: Պարզ է՝ հանրային պաշտոնյաներն ամեն դեպքում ավելի պաշտպանված են, քան քաղաքացիները: Իսկ օրենսդրական կամ տեխնոլոգիական կարգավորումները պետք է բերեն մշակութային ու կրթական փոփոխության: Երբ ծաղրում են պատգամավորի մազի ձևը, դա որևէ կերպ օրենքով սահմանելի չէ: Առհասարակ օրենքը որպես այդպիսին իր փիլիսոփայությամբ վերջին գործիքն է քաղաքականության մեջ: Ավելի շատ լավ կլիներ, որ մեզ մոտ լիներ կրթամշակութային և նորմատիվ փոփոխությունը»:
Պատգամավորը նկատեց, որ ժամանակին, երբ խոսքն առհասարակ ճնշվում էր, և այս կամ այն ռեժիմը, անհատ օլիգարխը հնարավորություն ուներ իրենց սխալ ասած մարդուն ծեծել, այդ խոսքը չէր լինում: Խոսելով ներկայիս իրավիճակի մասին՝ Սոս Ավետիսյանն ասաց. «Դա այն մի ազատությունն է, որն այսօր ունենք, բայց դրա հետ մեկտեղ կարևոր է, որ ստեղծենք քննարկման միջավայրը, որն այլ կլինի»:
Կարդացեք նաև
Նա նաև տեղեկացրեց, որ եվրոպական մի քանի հետազոտություններ ցույց են տալիս, որ ֆեյսբուքում և այլ սոցիալական ցանցերում ձևավորվում են խմբեր, որոնք կանխում են ատելության խոսքի տարածումը, ունեն իրենց չափանիշները: Պատգմավորը փաստեց, որ ՀՀ-ում այդ նորմատիվությունը չի ձևավորվում:
Տաթև ՀԱՐՈԻԹՅՈՒՆՅԱՆ
