ՄԱԿ Գլխավոր ասամբլեայի նախագահը հայտարարել է, որ հունիսի 17-ին կազմակերպության անդամ 193 երկրները ընտրելու են ՄԱԿ Անվտանգության, Տնտեսական և Սոցիալական խորհուրդների անդամներին, ինչպես նաև ասամբլեայի հերթական՝ 75-րդ նստաշրջանի նախագահին: Ինչպես հաղորդում է Associated Press-ը, նստաշրջանի աշխատանքները մեկնարկելու են սեպտեմբերին:
Տեղեկատվության համաձայն՝ ՄԱԿ Գլխավոր ասամբլեայի նախագահի պաշտոնի համար շրջանառվում է ընդամենը մեկ թեկնածուի՝ թուրք փորձառու դիվանագետ, քաղաքական գործիչ Վոլքան Բոզքիրի անունը: Նրա անունը նախապես ուղարկվել է ՄԱԿ անդամ բոլոր երկրներին, որպեսզի վերջիններս իրենց աջակցությունը հայտնեն Բոզքիրի թեկնածությանը, բայց մի քանի երկրների ներկայացուցիչներ քվեարկություն են պահանջել: Ըստ գործակալության՝ քվեարկություն են պահանջում Հայաստանի, Հունաստանի և Կիպրոսի դիվանագետները:
Պատրաստեց՝ Վիկտորյա ԱՆԴՐԵԱՍՅԱՆԸ
