ԱԺ «Լուսավոր Հայաստան» խմբակցության պատգամավոր Աննա Կոստանյանի համոզմամբ՝ միայն քրեականացման միջոցով հնարավոր չէ դիմակայել ատելության խոսքի՝ այսօրվա ծայրահեղ դրսևորումներին և տարածմանը: Ըստ պատգամավորի՝ ունենք նաև կրթական և մշակութային լուրջ փոփոխությունների կարիք:
«Հոդված 3» ակումբի կազմակերպած «Ատելության խոսքը սոցիալական մեդիայում. հայաստանյան իրողություններ» թեմայով տեսաքննարկմանը Աննա Կոստանյանը հայտարարեց՝ հետհեղափոխական Հայաստանում հանրային ամենալուրջ խնդիրներից մեկը հենց ատելության խոսքն է: Այնուհետև նշեց. «Այսօրվա զարգացումներին, միտումներին զուգահեռ միայն օրենսդրական կարգավորումներով չենք կարողանալու կանխել ատելության և վտանգավոր խոսքի տարածումը»:
Նա ասաց՝ խոսում է որպես կին, որը սոցիալական ցանցերում թիրախավորվել է ու նկատեց. «Ենթադրվում էր, որ կինը պետք է սեռով պայմանավորված՝ թիրախավորվի տղամարդկանց կողմից, բայց ավելի շատ թիրախավորվել եմ կանանց կողմից՝ որպես կին քաղաքական գործիչ, որը համարձակվում է այլ կարծիք ունենալ, քան այն, ինչ ընդունված է հասարակության մեջ կամ իշխանության կողմից»:
Պատգամավորը հայտնեց՝ իր դիտարկումները ցույց են տալիս, որ ավելի շատ թիրախավորվում են հանրային և քաղաքական դեմքերը ու մանրամասնեց. «Տարբեր միջազգային կազմակերպությունների մշտադիտարկումների արդյունքում պետք է որ հիմնական թիրախավորումը լիներ սեռական այլ կողմնորոշում ունեցող անձանց հանդեպ, բայց հանրային և քաղաքական դեմքերը շատ ավելի շատ են թիրախավորվում: Դրանք ավելի շատ են, քան կրոնական հայացքներով պայմանավորված կամ ռասայական պատկանելության պայմանավորված թիրախավորումները»:
Կարդացեք նաև
Տաթև ՀԱՐՈՒԹՅՈՒՆՅԱՆ
