«Քանի դեռ հակադիր կարծիքները, ատելության խոսքը սոցցանցերի ալգորիթմը խրախուսելու է, դրա դեմն օրենքով առնելը շատ դժվար է լինելու»,- «Հոդված 3» ակումբի կազմակերպած «Ատելության խոսքը սոցիալական մեդիայում. հայաստանյան իրողություններ» թեմայով տեսաքննարկմանն այսպիսի կարծիք հայտնեց լրագրող, բլոգեր, ՏՏ և մեդիա ոլորտի խորհրդատու Արթուր Պապյանը:
Նա փաստեց՝ օրենք ընդունելը երկարատև գործընթաց է, իսկ մյուս կողմից նշեց, որ ունենք սուպերդինամիկ զարգացող երևույթ՝ սոցցանցերում մեկնաբանությունները: Ըստ նրա՝ մինչ ինչ-որ թվով պատգամավորներ, իրավաբաններ փորձում են հասկանալ, թե ինչպես կարգավորել, հայտնվում է հերթական նոր զարգացումը, և ջանքերն ապարդյուն են դառնում:
Արթուր Պապյանն ասաց, որ ՀՀ օրենսդրությունն այս առումով հնացած է, և շատ բաներ ընդհանրապես կարգավորված չեն: Այնուհետև մանրամասնեց. «Ինտերնետ թիվի հասկացություն գոյություն չունի, էլ ի՞նչ խոսել դրա մեկնաբանության մոդերացիայի չափանիշների սահմանման մասին: Սա լինելու է վազք, որի հետևից հասնելը շատ դժվար է»:
Խոսելով լուծման տարբերակների մասին՝ նա ներկայացրեց ԱՄՆ-ի փորձը. «Այսօր ԱՄՆ-ում մեծ սկանդալ է հասունացել: Երբ թվիթերը փորձել է փաստերի ստուգում անել և Թրամփի հայտարարության տակ գրել, որ ոչ բոլոր փաստերն են կոռեկտ, Թրամփը նոր բանաձև է շրջանառության մեջ դրել, որ կարգավորեն սոցցանցերը. հիմա ԱՄՆ-ում մեծ քննարկում է: Աշխարհի ամենահզոր մարդը հրահանգել է կարգավորել սոցցանցերը, բայց օրենսդիրները մտածում են ու ոչ մի տարբերակ չեն գտնում դա անելու համար: Հավանաբար, երբ հասնեն լուծումների, գուցե ԱՄՆ նախագահը Թրամփը չլինի»:
Կարդացեք նաև
Ըստ Արթուր Պապյանի՝ սոցիալական ցանցերն իրենք կարգավորման մոտիվացիա չունեն, ընդհակառակը, նրանց ձեռնտու է այս իրավիճակը: Նա պարզաբանեց. «Իրենք էլ պայմաններ են ստեղծում: Ինտերնետային էջերը որևէ շահագրգռվածություն չունեն մաքրելու հայհոյանքները, ատելության խոսքը, քանի որ սոցցանցի ալգորիթմն այնպես է աշխատում, որ ինչքան շատ մեկնաբանություններ լինեն՝ հակադիր ծայրահեղական, այնքան այդ էջի ազդեցությունը բարձրանում է»:
Արթուր Պապյանն առաջարկեց՝ ինտերնետ հասարակության համաշխարհային համայնքը փորձի հարկադրել կամ խրախուսի մոդերացիան:
Տաթև ՀԱՐՈՒԹՅՈՒՆՅԱՆ
