«Լոգիկա» ֆինանսատնտեսական եւ գործարար անկախ հետազոտությունների կենտրոն» ՀԿ նախագահ, ԵՊՀ եւ ՀՌՀ դոցենտ Արա Քառյանն առցանց ասուլիսում անդրադառնալով գազի գնի շուրջ ստեղծված իրավիճակին եւ առկա խնդիրների լուծման թեմային՝ ասաց, որ գազի գնի բարձրացման հայտը բավարարելու առումով հիմա քննարկվում է, այսպես կոչված, դիվերսիֆիկացված տարբերակը, այն որ բնակչության համար գազի սակագինը չի թանկանա:
«Ես ուզում եմ շեշտադրումն անպայման սրա վրա անել: Փոխվարչապետ Մհեր Գրիգորյանի կողմից հնչեցվեց, որ սպասվում է այսպիսի տարբերակ. բնակչության համար գազի սակագինը կպահպանվի, իսկ տնտեսվարողների համար սակագինը կբարձրանա: Տեսնենք սրա հետեւանքները:
Բնակչությանն ասվում է՝ տեսեք, ամեն ինչ լավ էր, որ սակագինը չբարձրացավ: Բայց ի՞նչ կլինի շարունակությունը, ածանցվող հետեւանքները: Միանշանակ, տնտեսվարողների համար գազի գնի բարձրացումը կբերի նաեւ լայն սպառման ապրանքների թանկացման: Դա դեռ ոչինչ: Դրանից հետո շղթայում ավելի բարդ խնդիր է առաջանալու նրա հետ, որ մեր արտահանողների մրցունակությունը ԵԱՏՄ շուկայում հենց այդ որոշման պատճառով խիստ նվազելու է: Եթե ասում ենք, որ COVID-19-ի հաղթահարելուց հետո կբացվեն նոր հնարավորություններ, ապա այդ կոնկրետ հնարավորություններից մեկը ուղղակի էներգակիրների՝ նավթի եւ գազի, գներն աշխարհում երկու անգամ նվազելն է: Մեր իրավիճակն այլ է: Այս լուծումով, երբ տնտեսվարողների համար սակագինը պետք է բարձրանա, մենք կնվազեցնենք մեր արտահանողների մրցունակությունը:
Մենք ի՞նչ ունենք: Ընդհանրապես աշխատուժ ենք արտահանում: Արտագնա աշխատողները այս տարի սահմանները փակ լինելու հետեւանքով չեն մեկնելու: Հետեւաբար, խնդիր կունենանք առեւտրային հաշվեկշռի: Այսինքն, այն տրանսֆերտները, որ պետք է Հայաստան ուղարկեին արտագնա աշխատողները, չենք ստանա: Սա ամբողջ շղթա է եւ այս առումով կհորդորեի, որպեսզի վերանայվեն որոշումները, որպեսզի գազի գնի բարձրացումը չանդրադառնա բացառապես տնտեսվարողների վրա, ինչը բավականին վատ հետեւանքներ կունենա մեր տնտեսության համար եւ անգամ առեւտրային հաշվեկշռի վրա կանդրադառնա»,-ասում է Արա Քառյանը:
Կարդացեք նաև
Աշոտ ՀԱԿՈԲՅԱՆ
