Խորհրդարանի այսօրվա նիստում առաջին ընթերցմամբ քննարկվում է «Իմ քայլի» պատգամավոր Վահագն Հովակիմյանի հեղինակած՝ «Ազգային ժողովի կանոնակարգ» օրենքում փոփոխությունների օրինագիծը: Ըստ Վահագն Հովակիմյանի՝ խորհրդարանի կողմից պաշտոնյաներին ընտրելու գործընթացում որոշակի խնդիրներ կան, որոնց լուծմանն է միտված այս օրինագիծը. «Փոփոխությամբ կարգավորվում է պաշտոնների թեկնածուների եւ պաշտոններում ընտրության գործընթացը: Գործող օրենքն ԱԺ-ին թույլ չի տալիս պաշտոնների թափուր տեղերը ժամանակին համալրել, իսկ այս փոփոխությամբ՝ պատգամավորները կարող են նախաձեռնել արտահերթ նիստ եւ սահմանել օրակարգ»:
Նշենք, որ կարգավորումը վերաբերում է ԱԺ-ի կողմից նշանակվող եւ ընտրվող բոլոր պաշտոններին, այդ թվում՝ սահմանադրական դատարանի նախագահի պաշտոնին: Այս փոփոխությամբ խորհրդարանին հնարավորություն է տրվում արտահերթ նիստ անել եւ պաշտոնյանի ընտրություն իրականացնել` չսպասելով այդ պաշտոնում թեկնածուի առաջադրման ժամկետի ավարտին:
Արդարադատության փոխնախարար Վահե Դանիելյանը պարզաբանեց. «Պետական մարմինները որեւէ թեկնածու առաջադրելու համար երեսուն օր ունեն, որի ավարտից հետո միայն ԱԺ-ն պետք է ընտրի կամ քվեարկի թեկնածուի օգտին: Ըստ այս փոփոխության՝ այն դեպքերում, երբ թեկնածուն ներկայացվում է մինչեւ երեսուն օրվա ավարտը, ճկունության սկզբունքով ԱԺ-ն իրավունք կունենա արտահերթ նիստում իրականացնել թեկնածուի քվեարկությունը»:
Կարդացեք նաև
Լուիզա ՍՈՒՔԻԱՍՅԱՆ
