«Նոր կորոնավիրուսի հետ կապված իրավիճակը մեր երկրում շարունակվում է ահագնանալ»,- քիչ առաջ տեղի ունեցած բրիֆինգին հայտարարեց ՀՀ վարչապետ Նիկոլ Փաշինյանը:
Իսկ թե ինչու է մեզ հետ նման բան տեղի ունենում, Նիկոլ Փաշինյանն ասաց. «Մեր հիմնական խնդիրը հակահամաճարակային կանոնների պահպանումն է և դրա որակը: Մենք ունենք համոզվածություն, որ այդ կանոնների պահպանումը կբերի կորոնավիրուսով դեպքերի թվի նվազման՝ ընդհուպ զրոյացման»:
Ըստ Նիկոլ Փաշինյանի՝ իրենց իշխանության ծագումնաբանությունն այս իրավիճակում աշխատում է իրենց դեմ: Նա մանրամասնեց. «ՀՀ-ում 2018-ի իրադարձություններից հետո վախի մթնոլորտն ըստ էության զրոյացել է, բայց դրա փոխարեն, ցավոք, օրինապահության մթնոլորտը դեռ պատշաճ աստիճանի չի հասել: Գործ ունենք մի իրավիճակի հետ, երբ կանոնների, խախտումների արձանագրման որակի և կոշտության հետ էլ խնդիր ունենք»:
Կարդացեք նաև
Նիկոլ Փաշինյանն ասաց, որ ակնկալում են հակահամաճարակային կանոնների հսկողության կոշտություն և որակական փոփոխություն: Նա տեղեկացրեց, որ կեսօրին պարետատան նիստ է հայտարարել ու ընդգծել. «Պետք է հետևենք հակահամաճարակային պայմաններին ամենակոշտ ու չոր ձևով՝ հաշվի չառնելով որևէ փաստարկ, վարչական կամ այլ հարկադրանքի միջոցների ենթարկել մեր քաղաքացիներին: Նրանք պետք է նախապես մտածեն այդ իրավիճակի մասին: Մենք կանգնած ենք երկու ընտրության առաջ: Կամ այն փաստի բերումով, որ կանոնները չեն պաշտպանվում, մենք կրկին գնում ենք համատարած արգելափակումների՝ զուգորդելով սրանք պարետային ժամով, երկիրը ենթարկելով նոր ցնցումների, կամ միասին համագործակցաբար հսկողության տակ ենք առնում այս իրավիճակը: Սա է մեր ընտրությունը: Անկախ այս երկու սցենարներից պետք է հսկողությունը հակահամաճարակային կանոնների նկատմամբ կատարվի ամենաչոր կերպով՝ հաշվի չառնելով որևէ փաստարկ: Սա է եղել իմ հրահանգը իրավապահներին և խստորեն հետևելու եմ այդ հրահանգի իրականացմանը»:
Նիկոլ Փաշինյանն ասաց, որ այս առումով մեկ-երեք օր ունենք, որ երկրում որակական իրավիճակ փոխենք:
Վարչապետն ասաց, որ թեև իր ընտանիքի և իր մոտ կորոնավիրուս է հայտաբերվել, սակայն իրենց վիճակը լավ է: Իր աշխատանքային գրաֆիկից դուրս են մնացել միայն ընդունելությունները. մնացածն իրականացնում է լիարժեք:
Տաթև ՀԱՐՈՒԹՅՈՒՆՅԱՆ
