Սեւանի ափամերձ տարածքներում, անօրինական կառուցված տները, շենք շինությունները, որոնք կգտնվեն սահմանված նիշից այն կողմ, կապամոնտաժվեն: Այսօր այս մասին «Արմենպրեսի» մամուլի սրահում ասաց շրջակա միջավայրի նախարարի տեղակալ Իրինա Ղափլանյանը: Նրա խոսքով, այդ օբյեկտները դեռեւս անցյալ տարվա ընթացքում գույքագրվել են եւ դրանց թիվը բավականին մեծ է:
Իրինա Ղափլանյանն ասաց, որ Գեղարքունիքի մարզպետի եւ «Սեւան ազգային պարկի» տնօրենի հետ քննարկման ժամանակ տեղեկացել է, որ բոլոր քաղաքացիներն այդ մասին ծանուցվել են. «Իհարկե խնդրահարույց է լինելու՝ հաշվի առնելով, որ դրանք ապամոնտաժվելու են: Ըստ կարգի, եթե քաղաքացին չի ապամոնտաժում, ապա, դա անելու է պետությունը: Ինչեւէ, մենք ներկայացրել ենք նախագիծ: Այդ գույքագրված շինություններից 32-ը հանրային են եւ դրանք առաջնային կապամոնտաժվեն, որովհետեւ, այս պահի դրությամբ մենք բյուջեից գումար ենք հայցել, որպեսզի դա իրականացվի: Իսկ մնացած շենք-շինությունների մասով, քաղաքացիների հետ կաշխատենք, որ մյուսներն էլ ապամոնտաժենք»:
Փոխնախարարի տեղեկացմամբ, առաջնային թիրախավորվել են այն շենք-շինությունները, որոնք ժամանակավոր կառույցներ են եւ ապամոնտաժելը կլինի ոչ խնդրահարույց: Սակայն այնտեղ կան տարածքներ եւ շենք-շինություններ, որոնք սեփականության իրավունքով են. «Այս դեպքերն այլ մարմիններ պետք է հետազոտեն՝ ինչպես է դա տեղի ունեցել՝ հաշվի առնելով, որ վարձակալությամբ տրամադրված տարածքներ էին»:
Ըստ Ղափլանյանի, ապամոնտաժման գործընթացն այնքան էլ հարթ չի ընթանա, որովհետեւ կան բողոքողներ, բայց այդ հարցով արդեն այլ մարմիններ պետք է զբաղվեն:
Կարդացեք նաև
Լուսինե ԲՈՒԴԱՂՅԱՆ
