«Ոստիկանության գործողությունները ոչ իրավաչափ են եղել»,- Sputnik Արմենիա մուլտիմեդիոն մամուլի կենտրոնում հրավիրված առցանց քննարկմանը հայտարարեց Քաջարանի դեպքերով հարուցված քրեական գործի շրջանակում կալանավորված Բաբկեն Համբարձումյանի պաշտպան, փաստաբան Կարեն Ղազարյանը:
Հիշեցնենք՝ «քաջարանյան գործով» մեղադրյալներ Լեւոն Համբարձումյանն ու Բաբկեն Համբարձումյանը կալանավորված են:
Մայիսի 24-ին մեծ թվով քաջարանցիներ հավաքվել էին ոստիկանության Կապանի բաժնի մասնաշենքի առջև։ Այդ օրն առավոտյան մի քանի քաջարանցի երիտասարդներ բերման էին ենթարկվել ոստիկանություն։ Քաջարանցիները վրդովված էին, որ բռնություններ էին կիրառվել նրանց նկատմամբ:
Կարեն Ղազարյանը ներկայացրեց Կապանում տեղի ունեցած իրադարձությունների նախապատմությունը. «Մեզ դիմել էին սույն գործով մեղադրյալները և նրանց ազգականները, թե Քաջարանում լուրեր են շրջանառվում, որ իրենց նկատմամբ պատրաստվում են քրեական հետապնդում իրականացնել: Ամեն անգամ չէ, որ Կապանում և Քաջարանում կարող է գտնվել գլխավոր վարչությունից քննչական խումբ, ոստիկանական հատուկ զորքեր: Այս ամենն անհանգստություն էր առաջացել և որոշակի մտավախություն ունենալով՝ մեզ դիմել էին: Ուրբաթ օրն արդեն Քաջարանում էինք, ունեցել ենք կոնսուլտացիաներ, եկել ենք այն մտքին, որ սպասենք ծանուցման: Չէին բացառում նաև բերման ենթարկելու տարբերակը, բայց բացառում էին այդ կերպ բերման ենթարկելը: Կիրակի առավոտյան կապվեցին և հայտարարեցին, որ Քաջարանի երեք քաղաքացիներ՝ նրանցից երկուսն արդեն մեր պաշտպանյալներն են, Կապանի ոստիկանության բաժին են բերման ենթարկել: Մի քանի րոպե հետո հասանք ոստիկանության բաժին»:
Կարդացեք նաև
Փաստաբանն ասաց, որ իրենց պաշտպանյալների հետ պայմանավորվածություն են ունեցել՝ պետք է պահանջեն փաստաբանի ծառայություն, սակայն նրանց զանգի հնարավորությունը չէին տվել: Այնուհետև նշեց, որ փաստաբաններին թույլ չեն տվել մուտք գործել ոստիկանական բաժին՝ իրենց պաշտպանյալների մոտ, փոխարենը ցուցադրաբար իրենց առջևով այդ երկու երիտասարդներին՝ գլուխը իջեցրած, թևերը ոլորած, տարել են քննչական բաժին: Փաստաբանն ասաց, որ միայն քննիչների հետ բանակցություններից հետո կարողացել են մուտք գործել քննչական բաժին իրենց պաշտպանյալների մոտ: Նա տեղեկացրեց, որ հաղորդում են ներկայացրել հանցագործության մասին փաստաբանների աշխատանքը խոչընդոտելու համար:
Խոսելով բռնությունների մասին՝ փաստաբանն ասաց. «Մենք այդ ժամանակ զանգեր էինք ստանում, թե բռնություններ են կիրառվում: Սակայն ես նշում էի, որ այս երկու տղաների նկատմամբ այս պահին չի կիրառվում բռնություն: Ոստիկանության դիմաց մի քանի ազգականներ հեռու կանգնած էին: Այդ ընթացքում մեկ այլ անձ էլ սխալմամբ բերմամբ էր ենթարկվել և նրա նկատմամբ բռնություն է կիրառվել: Ես ստացա լուսանկարներ բռնության հետքերով, բայց անձամբ նրա պաշտպանությունը չեմ ստանձնել: Ու այդ պահից սկսած լսեցի աղմուկ. պատուհանից տեսա, որ բազմությունը շատանում է, քանի որ տեղեկություն կար, որ երիտասարդներին բոլորին բռնության են ենթարկել»:
Կարեն Ղազարյանը վստահեցրեց՝ քննությունն ի սկզբանե տարվել է փաստաբանների և երիտասարդների իրավունքների ոտնահարմամբ ու շարունակեց. «Այսօր տեսնում ենք, որ շարունակվում է այդ փաստի անտեսումը՝ իրենց կայացրած որոշումների ոչ օբյեկտիվության առումով: Ձերբակալում են երիտասարդներին այն դեպքում, երբ փաստաբանները երկու օր առաջ եկել, սպասում էին: Ձերբակալում են՝ կոշտ, բռնի, ոչ համաչափ ուժ կիրառելով, առանց ծանուցելու, առանց մինչև կասկածյալ ձերբակալելը այլ կարգավիճակում նրանց լսելու: Այս առումով ոստիկանության գործողությունները ոչ իրավաչափ են եղել: Չեմ կարող ասել՝ իրականում բռնություն եղե՞լ է երիտասարդների նկատմամբ, թե՞ ոչ. իմ ներկայությամբ բռնություն չի եղել: Երիտասարդներն իրենք պիտի ասեն»:
Խոսելով այն դիտարկումների մասին, թե Սյունիքից սկսվում է հակահեղափոխական շարժում՝ Կարեն Ղազարյանը հայտարարեց. «Այդ ժողովուրդը՝ քաջարանցիները քաղաքականության հետ ընդհանրապես կապ չունեն: Նրանք սկսեցին հավաքվել, երբ բռնությունների մասին ահազանգ եղավ, երբ երիտասարդների նկարները տարածվեցին: Իրենց ինքնաբուխ հավաքն իրենց համաքաղաքացիների իրավունքների պաշտպանելու համար էր: Եթե ոստիկանությունը մեզ թույլատրեր օրենքով նախատեսված կարգով մուտք գործել ոստիկանություն, չէր լինի ոչ ենթադրյալ բռնություն, ոչ հավաք, համաճարակային պայմաններում մարդիկ իրենց կյանքը վտանգելով չէին կանգնի անձրևի տակ: Սա քաջարանցիների ըմբոստությունն էր անօրինականության դեմ, նրանք հերոսներ են: Իրենք ունեն իրենց համակեցության կանոնները, բոլորը բոլորին ճանաչում են, իսկ երիտասարդներն առաջին իսկ կանչի դեպքում ներկայանալու էին»:
Խոսելով գործով մեղադրյալ Բաբկեն Համբարձումյանի ձերբակալման և կալանավորման մասին՝ փաստաբանը տեղեկացրեց, որ նա ունի զույգ երեխաներ, որոնցից մեկն ունի լուրջ առողջական խնդիր, ծախսատար բժշկական պրոցեդուրաներ է անցնում, իսկ տան միակ աշխատողը Բաբկենն է: Իսկ մյուս կալանավորվածը նրա եղբայրն է՝ Լևոն Համբարձումյանը: Նույնիսկ, երբ ինքն է տեսել երեխայի տեսանյութերը, սարսափել է: Այս առիթով փաստաբանն ասաց. «Չի կարող քրեական դատավարությամբ նախատեսված որևէ ռիսկ՝ օրինակ՝ խոչընդոտման ռիսկն, ավելի բարձր արժեք ունենալ, քան երեխայի առողջությունը: Էլ ի՞նչը կարող է ավելի կարևոր լինել, քան մանկահասակ երեխայի առողջությունը: Իսկ խոչընդոտման ռիսկը հնարավոր է չեզոքացնել՝ գրավով, տուժողի նկատմամբ պաշտպանության միջոց կիրառելով, օպերատիվ գործողություններով»:
Փաստաբանը չբացառեց, որ անհրաժեշտության դեպքում միգուցե հրապարակեն Բաբկեն Համբարձումյանի երեխայի առողջության հետ կապված տեսանյութեր և բոլոր մայրերին կոչ արեց համերաշխություն հայտնել Բաբկեն Համբարձումյանին կալանքից ազատելու և երեխայի բուժումը դրսում շարունակելու համար:
Տաթև ՀԱՐՈՒԹՅՈՒՆՅԱՆ
