ԱԺ նիստում այսօր «Իմ քայլի» պատգամավոր Քրիստինե Պողոսյանը դիմեց ԲՀԿ առաջնորդ Գագիկ Ծառուկյանին, խմբակցության քարտուղար Արման Աբովյանին եւ ԱԺ մարդու իրավունքների պաշտպանության հանձնաժողովի նախագահ Նաիրա Զոհրաբյանին՝ ասելով. «Նա միշտ խոսել է մարդու իրավունքներից, մարդու հանդեպ հարգանքից, ատելության խոսքի բացառումից եւ դրանց հետեւանքով առաջացած խնդիրներից: Եթե դուք ձեր խմբակցությունում ունեք պատգամավոր/պատգամավորներ, որոնք լուրջ հոգեբանական խնդիրներ ու դաստիարակության իսպառ բացակայություն ունեն, եթե դուք չեք կարողանում նրանց հետ լեզու գտնել եւ օգնություն ցույց տալ, դիմեք մեզ: Մենք լավ բժիշկների եւ հոգեբուժարանների տեղը գիտենք, նրանք կօգնեն այդ մարդուն ճիշտ ճանապարհի վրա բերել: Սա արդեն անթույլատրելի է, դաստիարակության բոլոր սահմաններն անցնում է ձեր գործընկերը, կարգի հրավիրեք նրան»:
Նշենք, որ Պողոսյանի ելույթից առաջ ամբիոնից խոսում էր «Իմ քայլի» պատգամավոր Սոնա Ղազարյանը, որը հիշատակել էր, որ երեխաների իրավունքների մասին բարձրաձայնող որոշ պատգամավորներ «կողմ» չէին քվեարկել երեխաներին սեռական շահագործումից պաշտպանող կոնվենցիային:
Լուիզա ՍՈՒՔԻԱՍՅԱՆ
