«Ոստիկանության բարեփոխումների նպատակը մասնագիտացված ոստիկանի կերպարի ստեղծումն է: Տպավորություն է, թե ճանապարհային ոստիկանությունը եւ պարեկապահակետային ծառայությունը միավորվելու են եւ դառնան պարեկային ծառայություն, բայց իրականում այդպես չէ: Պարեկային ոստիկանությունը նոր սկզբունքներ եւ արժեհամակարգ է ունենալու, որոնք էական տարբերվելու են ոստիկանությունում հիմա առկա բոլոր ստորաբաժանումներից»,-ԱԺ նիստում այսօր ՀՀ ոստիկանության բարեփոխումների վերաբերյալ օրինագծի երկրորդ ընթերցման ժամանակ հայտարարեց «Իմ քայլի» պատգամավոր, ոստիկանության նախկին պաշտոնյա Արմեն Խաչատրյանը:
Հիշեցնենք, որ այս օրենսդրական փոփոխությամբ ստեղծվելու են պարեկային ծառայություն եւ օպերատիվ կենտրոն:
Խաչատրյանի խոսքով՝ պարեկային ոստիկանությունն ավելի լայն ծառայություններ պետք է ունենա, քան վերոնշյալ երկու ծառայությունները. «Պետք է ունենա լիազորությունների այնպիսի ծավալ, որը հարկադրական գործառույթների հետ կապված չէ: Պարեկը հանրության եւ պետության միջեւ կապը պետք է լինի: Այսօր ունենք իրավիճակ, երբ մի շարք կոնֆլիկտային հարցերում, որոնք հանցագործություններ եւ խախտումներ չեն, բայց վեճեր են, քաղաքացին դիմում է ոստիկանությանը, վերջինս էլ չի կարողանում միջամտել: Առավելագույնը, որ անում է, խորհուրդ է տալիս դիմել դատարան, ինչը գործուն մեխանիզմ չէ: Եթե ավելի պարզ, հարեւանի ընտանի կենդանին մտնում է տարածք, վեճ է լինում, իսկ ոստիկանությունը լիազորություն չունի այստեղ»:
Ըստ Արմեն Խաչատրյանի՝ պարեկային ոստիկանը նման վեճերը լուծելու համար պետք է ունենա գործադրիչ-կարգադրիչ լիազորություններ, ինչը կբարձրացնի նրա դերակատարումը. «Ոստիկանության բարեփոխումներն օր առաջ պետք է արվեն: Բարեփոխումները պայմանավորված են ոչ թե ոստիկանության վատ աշխատանքով, այլ ժամանակի անհրաժեշտությամբ: Ոստիկանությունն այսօր համարժեք չէ հանցավորությանը, նկատի չունեմ օրենքով գողերին եւ գողական կրիմինալին, որովհետեւ այս ուղղությամբ ոստիկանության պայքարը բավականին արդյունավետ է: Լայնածավալ պայքար կա կոռուպցիայի դեմ, որի հանցավորության սուբյեկտները էականորեն տարբերվում են, նյութական եւ իրավական պաշտպանության, քաղաքական մեծ ռեսուրսներ ունեն, ուստի ոստիկանությունը պետք է պատրաստ լինի դիմակայելու»:
Կարդացեք նաև
Լուիզա ՍՈՒՔԻԱՍՅԱՆ
