ԱԺ նիստում այսօր քննարկվում է ոստիկանության բարեփոխումների վերաբերյալ օրինագիծը երկրորդ ընթերցմամբ եւ ամբողջությամբ ընդունելու հարցը: ՀՀ արդարադատության նախարարի տեղակալ Քրիստինե Գրիգորյանը տեղեկացրեց՝ ԲՀԿ-ն առաջարկել է օրենքի ուժի մեջ մտնելու ժամկետը սահմանել 2021թ.-ի հունվարի մեկը. «Սակայն մեր տրամաբանութամբ եւ գործողությունների պլանի համաձայն՝ չենք կարող նման ժամկետ սահմանել: Հնարավորինս շուտ պետք է օրենքն ունենանք, որ ընդունելություն սկսենք պարեկային ծառայության համար: ԲՀԿ-ն նաեւ առաջարկել էր, որ միայն ոստիկանական միջին մասնագիտական կրթություն ունեցող անձինք կամ կառավարության սահմանած՝ որոշակի մասնագիտության բարձրագույն կրթություն ունեցողները մասնակցեն մրցույթին, բայց կառավարության համար ընդունելի չէ դա: Բացի այդ, հասկանալի չէ, թե ինչ մասնագիտությունների մասին է խոսքը: Մյուս կողմից, մենք բաց մրցույթ ենք հայտարարելու, որին կարող են մասնակցել թե ոստիկանները եւ թե բոլոր քաղաքացիները, ուստի ԲՀԿ-ի առաջարկը հակասում է մեր մոտեցմանը: Պարեկային ծառայությունը բազային կրթություն է ենթադրում, բայց որեւէ երկրում բարձրագույն կրթության պարտադիր պահանջ չկա»:
Հիշեցնենք, որ այս փոփոխություններով՝ ճանապարհային ոստիկանության փոխարեն գործելու են պարեկային ծառայությունն ու օպերատիվ կենտրոնը:
ԲՀԿ պատգամավոր Արման Աբովյանը հետաքրքրվեց՝ ինչո՞ւ է այս փոփոխությունների օրինագիծը նման հրատապությամբ քննարկվում՝ երկրորդ ընթերցման կազմակերպման 24-ժամյա ընթացակարգով: Փոխնախարարը նշեց, որ դա պայմանավորված է կառավարության հաստատած՝ ոստիկանության բարեփոխումների ռազմավարական ծրագրով, ըստ որի՝ այս տարի է նախատեսվում պարեկային ծառայության գործարկում. «Մենք ուզում ենք եւ կարող ենք հունիսին մրցույթի հայտարարություն անել, հայտերն ուսումնասիրել, քննություն կազմակերպել, հետո՝ 5-ամսյա կրթություն իրականացնել: Իսկ քաղաքական առումով օր առաջ այս բարեփոխումները սկսելու պայմանները կան: Մեր կառավարությանը եւս քննադատել եք, որ ոստիկանության բարեփոխումներն ուշանում են, իսկ հիմա հարցնում եք, թե ինչու ենք հրատապ կարգով օրինագիծը բերել»:
Կարդացեք նաև
Լուիզա ՍՈՒՔԻԱՍՅԱՆ
