Օրերս ՀՀ ԳԱԱ Մոլեկուլային կենսաբանության ինստիտուտի տնօրեն Արսեն Առաքելյանը ՀՀ ԳԱԱ նախագահ ակադեմիկոս Ռադիկ Մարտիրոսյանին և ՀՀ ԳԱԱ բնական գիտությունների բաժանմունքի ակադեմիկոս-քարտուղար Ռուբեն Հարությունյանին ասել էր, որ ՀՀ ԳԱԱ Մոլեկուլային կենսաբանության ինստիտուտն իր արտադրած կորոնավիրուսի ախտորոշման թեստերը շուտով կուղարկի փորձարկման ՀՀ առողջապահության նախարարություն:
Aravot.am-ը Արսեն Առաքելյանից հետաքրքրվեց, թե ինչ փուլում է գործընթացը: «Մենք հենց այսօր թեստերը տանում ենք փորձարկման, ավելի ուշ այդ մասին հայտարարություն կարվի»,-ասաց Մոլեկուլային կենսաբանության ինստիտուտի տնօրենը:
Հարցրինք, թե մոտավորապես ե՞րբ հայտնի կլինեն արդյունքները: Արսեն Առաքելյանն ասաց, որ այդ հարցին ինքը հստակ պատասխանել չի կարող, նաեւ հավելեց. «Հույս ունեմ, որ սեղմ ժամկետներում»:
Իսկ եթե ամեն ինչ բարեհաջող հանգուցալուծում ստանա, ե՞րբ կսկսեն թեստեր արտադրել: « Հենց փորձարկումների դրական եզրակացությունը լինի, տառացիորեն հաջորդ օրը կսկսենք թեստերի արտադրությունը: Մենք ամեն ձեւով պատրաստ ենք դրան: Այսօր թեստերի առաջին խմբաքանակը կտանք փորձարկման ու կսպասենք պատասխանի»,-ասաց Արսեն Առաքելյանը:
Կարդացեք նաև
Հավելենք, որ ինստիտուտն աշխատում է ՀՀ առողջապահության նախարարության և Հիվանդությունների վերահսկման, կանխարգելման ազգային կենտրոնի հետ:
Ավելի վաղ Արսեն Առաքելյանը վստահեցրել էր, որ իրենց թեստերը զգայուն են և կարող են հայտնաբերել վիրուսը՝ համեմատաբար ցածր տիտրի (վիրուսի կոնցենտրացիայի) դեպքում: Իսկ փորձարկման շրջանից հետո իրենք նախատեսում են օրական շուրջ 1000-2000 թեստ արտադրել:
Գոհար ՀԱԿՈԲՅԱՆ
Լուսանկարում՝ Արսեն Առաքելյանն ու Ռադիկ Մարտիրոսյանը:
