Aravot.am-ն այսօր գլխավոր դատախազ Արթուր Դավթյանին հարցրեց՝ ասում են՝ Հրայր Թովմասյանին ընտրել է ՀՀԿ-ի մեծամասնությամբ նախկին ԱԺ-ն ու նրան համարում են ոչ լեգիտիմ ՍԴ նախագահ, ասում են՝ ՀՀԿ-ին մերժել է հանրությունը, մերժել է նաեւ նրան, բայց ո՞նց է ստացվում, որ ձեզ նույնպես նախկին ԱԺ-ն է ընտրել, իսկ ձեզ պարգեւներ, մեդալներ են տալիս ու լեգիտիմ են համարում:
Նա պատասխանեց. «Ինձ նախկինը չի ընտրել, դրանից առաջինն է ընտրել»: Նա ուզում էր հեռանալ, խնդրեցինք, որ պատասխանի, որովհետեւ այս հարցադրումները մամուլում, սոցցանցերում հնչում են՝ ուզի, թե չուզի: Մարդիկ հարցնում են՝ երկու գրեթե նմանատիպ իրավիճակ է, ՍԴ նախագահին համարում են ոչ լեգիտիմ, ձեզ՝ պարգեւներ, ո՞նց է ա ստացվում, մարդիկ հարցնում են՝ ի՞նչ գին է վճարել: Դավթյանը պատասխանեց. «Հիմա ով ինչ է իրականացնում, ամեն մարդ պատասխանատու է իր գործողության, իր արարքի համար: Եթե որեւէ մեկը լավ աշխատանք է կատարել, ուրեմն արժանանում է դրան համարժեք գնահատականի: Մեկը կարգապահական խախտում է թույլ տվել՝ կարգապահական պատասխանատվության է ենթարկվում, մեկը հանցագործություն է թույլ տվել, ուրեմն՝ քրեական պատասխանատվության: Եվ դա վերաբերում է բոլորին՝ առանց բացառության եւ այստեղ պետք չի ինչ-որ բաներ փնտրել»:
Հռիփսիմե ՋԵԲԵՋՅԱՆ
