«Դավիթ Սանասարյանի գույքերի նկատմամբ հետաքրքրությունը այն աստիճանի է եղել, որ նույնիսկ 2013 թվականին մեքենայի առքուվաճառքի վերաբերյալ տեղեկություն են կցել գործին»,-այսօր դատարանում ռեպլիկ նետեց ՊՎԾ լիազորությունները ժամանակավորապես կասեցված պետ Դավիթ Սանասարյանի պաշտպան Արսեն Սարդարյանը:
Հիշեցնենք, Երևանի ընդհանուր իրավասության դատարանում այսօր շարունակվում էր Դավիթ Սանասարյանի և ՊՎԾ նախկին աշխատակիցներ Գևորգ Խաչատրյանի, Սամվել Ադյանի և նրա ընկեր Տարոն Ավետիսյանի գործով դատական նիստը: Դատարանն ապացույցների հետազոտության փուլում է: Մոտ երկու ժամ տեւած նիստում դատավոր Դավիթ Բալայանն ուսումնասիրում էր գործում առկա փաստաթղթերը եւ քանի որ ուսումնասիրվող փաստաթղթերը գործի ելքի համար ապացուցողական նշանակություն չունեին, կողմերը հայտարարություններ չարեցին:
Միայն մի դրվագով հայտարարություն արեց Դավիթ Սանասարյանի պաշտպանը, որը վերաբերում էր 2013 թվականին Դավիթ Սանասարյանի մեքենայի առուծախի գործարքին: Պաշտպանի վրդովմունքը զարմացրեց դատավորին: Վերջնս հետաքրքրվեց`անօրինակա՞ն կերպով են փաստաթղթերը ներկայացվել: Պաշտպանը բացատրեց, որ դա պարզապես ցույց է տալիս, որ «ԱԱԾ-ն սովորականին չնմանվող մոլությամբ է փորձել Դավիթ Սանասարյանի վերաբերյալ տեղեկություններ հավաքել»: Նման խորությամբ գործի պաշտպանն իր պրակտիկայում չէր հանդիպել:
Պաշտպանի այս դիտարկումները դուր չեկան մեղադրող դատախազ Գեւորգ Սարգսյանին: Նա հակադարձեց` պաշտպանը վարույթն իրականացրած մարմնի հասցեին ոչ կառուցողական հայտարարություններ է անում: «Բոլոր ամբաստանյալների վերաբերյալ նման տեղեկություններ հանված են: Հավաստիացնում եմ, որ գործի ամբողջականությունն ապահովելու նպատակով այդ գործողությունները բոլոր քրեական գործերով կատարվում են: Պարոն Սարդարյանի անձնական խնդիրն է, որ ինքը դրանց նախկինում չի հանդիպել, գուցե ԱԱԾ-ի հետ կապված գործեր չի ունեցել»: «Այսինքն՝ բոլոր գործերով մեքենաների առուծախի 10 տարվա գործարքները դնում եք գործի մե՞ջ»,- շարունակեց Դավիթ Սանասարյանի պաշտպանը: Դատավորն ընդհատեց բանավեճը:
Կարդացեք նաև
Հիշեցնենք, Դավիթ Սանասարյանին մեղադրանք է առաջադրվել հեմոդիալիզի հայտնի գործով: ՀՀ քննչական դեպարտամենտում ՊՎԾ նախկին պետի նկատմամբ քրեական գործ էր հարուցվել 308 հոդվածի առաջին մասով`պաշտոնական լիազորությունների չարաշահում: Դավիթ Սանասարյանն ի սկզբանե պնդում էր, որ «Նոր Հայաստանում» իր նկատմամբ որոշ տեղերից կազմակերպվեց շինծու մեղադրանքով գործ, որն աղերս չունի իրականության հետ:
Հաջորդ նիստը կկայանա հունիսի 23-ին, 10.30-ին:
Նելլի ԳՐԻԳՈՐՅԱՆ
