«Զաքիր Հասանովի սպառնալից հայտարարությունում նա, ըստ էության, խոստովանել է, որ 2016թ.-ի ապրիլյան քառօրյան սանձազերծել է Ադրբեջանը»,-ԱԺ նիստում այսօր անդրադառնալով Ադրբեջանի պաշտպանության նախարար Զաքիր Հասանովի այն հայտարարությանը, որ ապրիլյան ռազմական գործողություններում Ադրբեջանն իր խնդիրը չի կարողացել կատարել, ասաց «Իմ քայլը» խմբակցության ղեկավար Լիլիթ Մակունցը:
«Ինչպես 90-ականներին եւ 2016թ.-ին, այնպես էլ ցանկացած այլ պահի Ադրբեջանի ագրեսիայի պատասխանը լինելու է ավելի քան համարժեք եւ ուժգին: Մենք մեր ապրելու իրավունքի առաջ չենք ընկրկելու՝ անկախ կուսակցական պատկանելությունից: Մեր կարեւոր խնդիրն է՝ միջազգային հանրության ուշադրությունը հրավիրել նման հայտարարությունների վրա, որովհետեւ Ադրբեջանը շարունակ խախտում է Մինսկի խմբի ձեւաչափի երեք կարեւոր սկզբունքներից մեկը, այն է՝ ուժի եւ ուժի սպառնալիքի բացառումը»,-փաստեց Մակունցը:
Նկատի ունենալով այն փաստը, որ Հասանովի հայտարարությանը նախորդել էր Ադրբեջանի նախագահ Իլհամ Ալիեւի՝ «աշխարհում առաջնային է ուժի գործոնը» արտահայտությունը, Լիլիթ Մակունցը շեշտեց՝ միջազգային հանրությունը եւ խաղաղության համար պատասխանատու կառույցները չպետք է անտարբեր լինեն Ալիեւի հայտարարությունների հանդեպ, որովհետեւ անտարբերությունը կարող է ազատ արձակել Ալիեւի ձեռքերը եւ նոր էսկալացիայի հանգեցնել, եւ որովհետեւ այն ուժգին պատասխան է ստանալու եւ աղետալի հետեւանքների հանգեցնելու հենց Ադրբեջանի համար:
Կարդացեք նաև
Լուիզա ՍՈՒՔԻԱՍՅԱՆ
