Դատական ակտերի հարկադիր կատարման էլեկտրոնային աճուրդում, ի թիվս տարբեր գույքերի, Հայաստանի համայնքներում գտնվող վարելահողեր, տնամերձ ու գյուղատնտեսության նշանակության հողատարածքներ էլ են աճուրդի հանված։ Կարելի է ասել՝ «ջրի գնով»:
Հարկադիր աճուրդի եղանակով հիմնականում վաճառվում է վարկերի տակ մնացած քաղաքացիների ու բիզնեսների գրավադրած գույքը, որի վաճաքից ստացած գումարներով մարվում է պարտատիրոջ պարտքը: Ճիշտ է հարկադիր էլեկտրոնային աճուրդի հարթակում տվյալ գույքի կամ ապրանքի մեկնարկային գներն են նշված, սակայն դատելով աճուրդին ներկայացված առաջարկների քանակի սակավությունից, դրանք ցածր գներով էլ վաճառվում են կամ՝ այդպես էլ մնում:
Շիրակի մարզի Հացիկ գյուղում սեփականության իրավունքով, վաճառվում է գյուղատնտեսական նշանակության հողամաս՝ 6900 քառակուսի մետր տարածքով: Հողամասը եղել է պտղատու այգի, սակայն մշակվում է, որպես վարելահող: Ջրովի է, ունի ոռոգման համակարգ: Մեկ հեկտարից պակաս այս հողամասի մեկնարկային գինը, ըստ հայտի, 360 հազար 309 դրամ է:
Արտաշատ քաղաքի թաղամասերից մեկում վաճառվում է սեփականության իրավունքով, տնամերձ հողամաս՝ 435 քմ տարածքով: Առկա է նույնիսկ մեկ հարկանի փոքրիկ բնակելի տուն: Այս տնամերձի մեկնարկային գինը 494 հազար դրամ է՝ մոտ 1000 դոլար: Արագածավան գյուղում, հարկադիր աճուրդով վաճառվում է ընդհանուր համատեղ սեփականության իրավունքով, գյուղատնտեսական նշանակության վարելահող, որն ունի ոռոգման համակարգ: Ընդհանուր մակերեսը՝ 6680 քմ է: Այն նույնպես հանդիսանում է գրավի առարկա՝ գինը՝ 319 հազար դրամ է:
Կարդացեք նաև
Երեւանից ոչ այնքան հեռու գտնվող Պռոշյան գյուղում վաճառվում է սեփականության իրավունքով, գյուղատնտեսական նշանակության խաղողի այգի, որի ընդհանուր մակերեսը՝ 2700 քմ է: Այն վաճառվում է ընդամենը 1 միլիոն 28 հազար դրամով: Մեկ այլ հայտից էլ տեղեկանում ենք, որ Արագածավան համայնքի Արտենի գյուղում վաճառվում է գյուղատնտեսական նշանակության վարելահող, որն ունի ոռոգման հնարավորություն: 3971 քմ տարածք զբաղեցնող վարելահողի մեկնարկային գինը 565 հազար դրամ է: Հարկադիր էլեկտրոնային աճուրդի հարթակից նաեւ տեղեկանում ենք, որ հողատարածքներից հետո ամենամեծ բաժինը գրավադրված բնակարաններինն է՝ այդ թվում եւ առանձնատները:
Հարկադիր աճուրդի են հանված նաեւ այգետնակներ, ավտոտնակներ, պահեստ, վագոն տնակներ եւ այլն:
Շարժական գույքի բաժնում հիմնականում մարդատար ավտոմեքենաներ են վաճառվում, իրոնց մեկնարկային գները 116 հազար դրամից սկսած մինչեւ 4-5 միլիոն դրամ են:
Ոսկյա զարդերի ու ոսկյա ջարդոնի բաժինը եւս ծանրաբեռնված է:
Էլեկտրոնային աճուրդի հանված ապրանքների ցանկից տեղեկանում ենք, որ գրավադրված են եղել ոսկյա մատանիներ, ականջօղեր, շղթաներ, ոսկյա խաչեր, կախազարդեր, ապարանջաններ ու այլ զարդեր:
Այս հարթակում վաճառվում են նաեւ էլեկտրական վառարաններ, ջրի տարա, գործող մեքենաներ, բջջային հեռախոսներ, ալկոհոլային խմիչք, հաստոցներ, արդուկ եւ այլ կենցաղային իրեր: Անգամ բաժնետոմսեր են աճուրդի հանված: Օրինակ՝ վաճառքի է հանված «Նոր Շինանյութեր» ընկերության կողմից թողարկված թվով 498 հատ հասարակ անվանական բաժնետոմսեր:
Լուսինե ԲՈՒԴԱՂՅԱՆ
«Առավոտ» օրաթերթ
30.05.2020
