ՊԵԿ նախկին նախագահ Գագիկ Խաչատրյանի բնակման հասցեի շուրջ շարունակվում է կրիմինալ ոդիսականը։ Ինչպես ժամանակին հայտնել էինք, Գագիկ Խաչատրյանի որդու անհետացումից հետո ԱԱԾ 7-րդ վարչությունը պարբերաբար ստուգում էր շենքում բնակվողների ավտոմեքենաները՝ խուզարկելու նպատակով, որպեսզի իբր գտնեն Գագիկ Խաչատրյանի որդուն։ Շենքում կա մոտ 80 բնակարան, և բնակիչները երեկ ուշ երեկոյան Aravot.am-ին կրկին ահազանգել են՝ ԱԱԾ գործողությունների կապակցությամբ։
Պարզվում է՝ Տերյան 66 հասցեում գտնվող շենքի շուրջ ամբողջ օրը ԱԱԾ-ի կողմից 4 դրոններ են թռչում, որոնք նկարահանումներ են անում բնակիչների բնակարանների մեջ։ Ինչը պատճառում է մեծ անհանգստություններ, անհարմարություններ և խախտում է անձնական կյանքի իրավունքը։
Իհարկե, դրոնները թռցնելու և պատուհանների տակ նկարահանումներ անելու բացատրությունն այն է, որ իբր փնտրում են Գագիկ Խաչատրյանի որդուն, բայց այս ամենը, ըստ բնակիչների, նմանվում է զավեշտի, որովհետև բոլորի բնակարանների մեջ, այսպես ասած, մտնող տեսախցիկներն ամբողջությամբ խանգարում են բնակիչների ընտանեկան կյանքն ու անդորրը։
