Պարետատան նիստից հետո վարչապետ Նիկոլ Փաշինյանը ուղիղ միացմամբ դիմելով ազգաբնակչությանը՝ հայտարարեց. «Ես կրկին ու կրկին ուզում եմ ուշադրություն հրավիրել պարետատան սահմանած կանոնները ճշգրիտ պահպանելու վրա: Երեք օրվա տուգանքների այս համատեքստում քննարկվում էր, թե ինչու են նույն ընտանիքի անդամները ավտոմեքենայի մեջ դիմակ չկրելու համար տուգանվում: Ես ուզում եմ հիշեցնել, որ պարետատան որոշմամբ ավտոմեքենային տրվել է փակ տարածքի կարգավիճակ, ինչպես ինքը կա ֆիզիկապես: Եվ ինչպես, օրինակ, առեւտրի կետերում , սուպերմարկետներում, այնպես էլ մեքենաներում, հասարակական տրանսպորտում, նույն ընտանիքի անդամները պարտավոր են կրել դիմակներ:
Երբ նախկինում ասում էինք՝ բացառեք առանց դիմակի շփումը ընտանիքի անդամ չհանդիսացող քաղաքացիների հետ, դա չի նշանակում, թե ընտանիքի անդամների հետ ամեն տեղ եւ ամենուր կարելի է շփվել առանց դիմակի: Այո, ավտոմեքենաների մեջ, տրանսպորտային միջոցներում, փակ տարածքներում, աշխատանքի վայրում, տնից դուրս պետք է պարտադիր ընտանիքի անդամների հետ շփվել բացառապես դիմակով: Իսկ տներում, նույնիսկ հարեւանների հետ պետք է շփվել բացառապես դիմակով:
Ուզում եմ նաեւ ընդգծել, որ նույնիսկ բացօթյա առեւտրի պարագայում անպայման պետք է առեւտուրն իրականացնել դիմակով եւ թե գնորդը, թե վաճառողը պետք է պարտադիր լինեն դիմակով»,-հայտարարեց վարչապետը:
Աշոտ ՀԱԿՈԲՅԱՆ
