Վարչապետ Նիկոլ Փաշինյանը պարետատան նիստից հետո կորոնավիրուսի դեմ պայքարի վերաբերյալ ճեպազրույցում նշեց, որ չնայած երեկ՝ նախորդ օրվա համեմատ, կորոնավիրուսով հաստատված դեպքերի թիվը նվազել է 209-ով, բայց դրանից համաճարակային իրավիճակի գնահատականը չի փոխվում:
«Մենք պետք է շարունակենք դիտարկել իրավիճակը՝ համոզվելու համար, թե արդյոք այսօրվա նվազումը որեւէ բովանդակային բան փոխե՞լ է մեր իրավիճակում: Ուզում եմ ընդգծել, որ հակահամաճարակային կանոնների խստիվ պահպանումը շարունակում է մնալ անհրաժեշտություն: Բայց նաեւ ուզում եմ ընդգծել, որ առաջիկա մեկ տարում է դա լինելու խստիվ անհրաժեշտություն: Եվ այն, որ չեն պահվում այդ կանոնները պատշաճ մակարդակի, վկայում է այն, որ ոստիկանությունը մոտ 1300 արձանագրություն է կազմել վարչական իրավախախտման վերաբերյալ, որոնք վերաբերել են դիմակ կրելու կանոնները խախտելու հանգամանքներին եւ նաեւ տեսչական մարմինները մոտ 87 կազմակերպության գործունեությունը դադարեցնելու առաջարկ են ներկայացրել պարետատուն եւ դրանց գործունեությունը դադարել է»,- ասաց վարչապետը:
Աշոտ ՀԱԿՈԲՅԱՆ
