«Կորոնավիրուսի համաճարակով պայմանավորված իրավիճակը Հայաստանում շարունակում է վատթարանալ: Երեկ ունեցել ենք 460 նոր դեպք: Մեկ միլիոն բնակչին ընկնող դեպքերով արդեն անցել ենք Իրանի եւ Ֆրանսիայի ցուցանիշները: Ըստ էության, հավասարվել ենք Ռուսաստանի ցուցանիշին»,-պարետատան նիստից հետո այսօր լրագրողների հետ ճեպազրույցում հայտարարեց ՀՀ վարչապետ Նիկոլ Փաշինյանը:
«Այս տեմպով շարունակվելու դեպքում կհասնենք Իտալիայի ցուցանիշին: Խոսքը մեկ միլիոն բնակչի հաշվով դեպքերի քանակի մասին է: Համաճարակի տարածման նման տեմպը, անկախ նրանից, թե վարակվածների քանի տոկոսն ունի ախտանշաններ, ինքնաբերաբար բերում է ծանր, ծայրահեղ ծանր եւ մահվան դեպքերի աճի»,-նշեց Փաշինյանը:
Նրա խոսքով՝ նման իրավիճակի պատճառը քաղաքացիների՝ հակահամաճարակային կանոնների ոչ պատշաճ պահպանումն է եւ դրանց ոչ պատշաճ լրջությամբ հետեւելը. «Դիմակը պետք է հանել միայն սնվելիս, պարբերաբար ախտահանել ձեռքերը, պահպանել սոցիալական հեռավորություն, բացառել առանց դիմակի շփումն ընտանիքի անդամ չհանդիսացող մարդկանց հետ: Առանց դիմակի շփվեք միայն ձեր ընտանիքի անդամների հետ: Շահարկումների առիթ չտալու համար շեշտեմ, որ տնային պայմաններում էլ կարող եք դիմակ պատրաստել: Այն պետք է փոխել 3-4 ժամը մեկ, ախտահանել, լվանալ եւ հաջորդ օրն օգտագործել»:
Կարդացեք նաև
Փաշինյանն ընդգծեց՝ վստահ են, որ այս կանոնների պահպանումը կբերի վարակվածների թվի նվազեցմանը եւ համաճարակի հաղթահարմանը. «Այն կախված է մեր առաջարկած կանոնների պահպանման որակից»:
Լուիզա ՍՈՒՔԻԱՍՅԱՆ
