Արագածոտնի մարզի Աղձք համայնքում կորոնավիրուսից մահացած 61-ամյա կնոջ հուղարկավորությունն էր այսօր: Ըստ որոշ տեղեկությունների, կինը վարակվել էր մոր հուղարկավորության ժամանակ:
Aravot.am-ի հետ զրույցում Աղձք համայնքի ղեկավար Արթուր Ավետիսյանն ասաց, որ դիակը գյուղ բերվել է փակ դագաղով, թաղմանն էլ երեք հոգի մարդ է մասնակցել՝ վարակի տարածումից խուսափելու համար: Տիկնոջ ընտանիքի անդամները նույնպես հիվանդանոց են տեղափոխվել:
Ըստ համայնքի ղեկավարի, Աղձքում հայտարարված չէ կարանտին, քանի որ դրա անհրաժեշտությունն այս պահին չկա:
Համայնքապետի խոսքով, գյուղում ոչ մի «խառնաշփոթ չկա, մարդիկ ապրում են իրենց բնականոն կյանքով», իսկ այն տեղեկությունները, թե մահացած կնոջ քույրն էլ է վարակվել նույն հուղարկավորության ժամանակ եւ կորոնավիրուսից մահացել, Արթուր Ավետիսյանի ներկայացմամբ, հավաստի չեն. «Ասում են ամբողջ Ձորափը (Աղձք) կորոնավիրուս է, նման բան չկա: Ես չեմ կարող ասել մահացած կնոջ քույրն ինչից է մահացել՝ կորոնավիրուսից թե այլ հիվանդությունից: Այո ինձ զանգահարել են, ասել են՝ կորոնավիրուսից, բայց ես ստույգ որեւէ բան չեմ կարող ասել, կամ հորքուրը կորոնավիրո՞ւս է, թե՞ չէ, ես նման տեղեկություններ չունեմ»:
Կարդացեք նաև
Համայնքապետի խոսքով, իրենց գյուղում այս պահին այլ վարակակիր չկա:
Լուսինե ԲՈՒԴԱՂՅԱՆ
