Թե՛ իշխանության, թե՛ ընդդիմադիրների մոտ պակասում է պետականության, պետության շահի գիտակցումն ու ընկալումը
Մայիսի 28-ին Հայաստանում կորոնավիրուսով վարակակիրների համար «ռեկորդային» թվեր գրանցվեցին: Վարակակիրների թիվն աճել էր 442-ով, գրանցվել էր մահվան 15 դեպք: Կորոնավիրուսի ընդհանուր դեպքերի թիվը հասավ 8216-ի, մահացածների ընդհանուր թիվը հասավ 113-ի, իսկ հիվանդությունից բուժվածների թիվն ավելացել է 32-ով եւ հասել 3 հազար 287-ի:
Արդեն իսկ պարզ է, մեր երկրում առողջապահական համակարգը բավական լուրջ բարդությունների առաջ է կանգնած: Դրա պատճառների մասին բազմիցս խոսվել է: Թեման թեժ պահողների պակասություն չկա, երբ մեր պետությունը հայտնվել է ծանր դրության մեջ: Եթե այս իրավիճակը պահպանվի, պարզ է նաեւ, որ առողջապահական համակարգից բացի, այլ ոլորտներում ենք խնդիրներ ունենալու:
Պատճառներն էլ հստակ են. արտակարգ դրության հայտարարումն ու նրան հաջորդած երկու ամիսները «ազատ» դրություն էին՝ առանց խիստ ու կոշտ վերահսկողության: Հիմա մենք, այսպես ասած, քաղում ենք այդ անփութության «պտուղները»: Իշխանությունը, որն իրավիճակի պատասխանատուն է՝ ձախողել է կորոնավիրուսի դեմ պայքարի գործընթացը:
Կարդացեք նաև
Բայց դրա մասին շարունակել անվերջ խոսել, նոր մեղավորներ փնտրել ու նոր սխալների վարկածների ներկայացման վրա ժամանակ կորցնելն է արդեն անիմաստ: Թվում էր, թե մեր երկրում իշխանությունն ու ընդդիմությունը սա պետք է գիտակցեին եւ անհապաղ անցնեին արտակարգ որոշումների մշակումների ու իրականացման գործընթացի կազմակերպմանը:
Բայց ի՞նչ է տեղի ունենում այսօր…
Նույնիսկ արդեն ծիծաղ էլ չեն առաջացնում խորհրդարանում քաղաքական դաշտի որոշ ներկայացուցիչների առանձին թեմաներով ընտրած ելույթներն ու հնչեցրած հարցերը: Մեր երկրում ամենաշատը, թերեւս, խոսվել է այն մասին, որ դժվար, ծանր պահերին մեր ժողովուրդը համախմբելու ուժ է գտնում: Սակայն գործնականում դրան նպաստելու ուղղությամբ քաղաքական էլիտան չի էլ մտածում, քայլեր չի ձեռնարկում: Յուրաքանչյուր քաղաքական ուժ իր «գծի» մեջ շարունակում է իր «պայքարը»:
Հետեւաբար, ի՞նչ կարող ենք այսօր արձանագրել… Թե՛ իշխանության, թե՛ ընդդիմադիրների մոտ պակասում է պետականության, պետության շահի գիտակցումն ու ընկալումը, կարեւորն անկարեւորից տարբերակելու ու պահը ճշգրիտ գնահատելու հմտությունը:
Այսօր Հայաստանը բարդ, չափազանց բարդ դրության մեջ է հայտնվել: Այս իրավիճակում որեւէ իշխանավոր առաջարկե՞լ է մոռանալ քաղաքական ընդդիմախոսներին օրինակ՝ 1-2 ամսով: Որեւէ ընդդիմադրի մտքով անցե՞լ է հայտարարել, որ 1-2 ամսով դադարեցնում է քննադատել իշխանությանը, եւ գոնե այս իրավիճակում դադարեցնել վիրավորանքները, ցածրորակ, երբեմն՝ նույնիսկ փողոցայինի բառապաշարով ելույթների ու տեքստերի հեղեղները:
Էլ ե՞րբ, եթե ոչ այսօր… Թե՞ համախմբելու մասին բարձրագոչ ելույթներն ու բաժակաճառերը միայն արտաքին թշնամու կողմից պարտադրված իրավիճակներին են վերաբերում:
Էմմա ԳԱԲՐԻԵԼՅԱՆ
«Առավոտ» օրաթերթ, 29.05.2020
