Մայիս 28-ի խորհուրդն ու նշանակությունը
1918 թ. մայիսի 28-ը՝ որպես հայոց պետականության վերականգնման մեկնակետ, բացառիկ կարևորություն ունի մեր անցյալը հասկանալու, ներկան իմաստավորելու և ապագան կերտելու համար: Ներկայիս Հայաստանի Հանրապետությունն իր արմատներով սկիզբ է առնում 1918-1920 թթ.-ի անկախ Հայաստանի Հանրապետությունից, նրա իրավահաջորդն է և նրան է պարտական իր գոյությամբ։ Այս իրավահաջորդությունն այն հիմքն է, որի վրա են խարսխվելու մեր իրավատիրությունը և մեր անսակարկելի ու անժամանցելի իրավունքները։ Եվ նրա համատեքստում է ստեղծվելու Արցախի հարցի լուծման հնարավորությունը։
Հայոց նոր պետականությունն իր սկզբնավորման պահից որդեգրել է ԱԶԱՏ, ԱՆԿԱԽ և ՄԻԱՑՅԱԼ ՀԱՅԱՍՏԱՆԻ գաղափարը, ինչը ենթադրում է՝ ազատ հասարակություն, անկախ պետականություն և միացյալ պետություն: Միայն այս երրորդության կենսագործմամբ է հնարավոր լինելու կերտել իսկապես ինքնիշխան և հաստատապես կենսունակ պետություն, ստեղծել անվտանգության ու զարգացման համար անհրաժեշտ պայմաններ և, ի վերջո՝ դրանց շնորհիվ երաշխավորել հայ ժողովրդի ազգային ու պետական գոյության հարատևումը:
Առանց ինքնիշխանության վերահաստատման և հզորացման հայոց պետականությունը մնալու է քաղաքականապես անհաստատ, բնույթով ապազգային, ռազմականապես խոցելի, տնտեսապես կախյալ և հոգեբանորեն վեհերոտ:
Կարդացեք նաև
Արդ՝ փառք հայոց պետականությունը վերակերտողներին, ներկա պետությունը պաշտպանողներին ու շենացնողներին և ապագան դարբնողներին:
Ազգային-ժողովրդավարական բևեռի նախաձեռնող խումբ
