Իշխանական ու ընդդիմադիր պատգամավորները՝ Քաջարանի դեպքերի, ոստիկանների բռնի գործողությունների մասին
Քաջարանում ծեծկռտուքի, մարդու առեւանգման, մարիխուանայի գործով ձերբակալությունները հանգեցրել էին բողոքի ցույցի: Քաջարանի քաղաքապետը հայտարարում է, որ դա քաղաքական հետապնդում է, իսկ Քննչական կոմիտեն հայտարարում է, որ իրենք քննչական գործողություններ են իրականացնում՝ պարզելու, թե համայնքի ղեկավարն ինչ մասնակցություն ու դերակատարում է ունեցել այդ դեպքերին, այդ թվում՝ ծեծկռտուքին ու առեւանգմանը: Իրավիճակն ավելի լարվեց, երբ համացանցում տարածվեցին այդ գործով թյուրիմացաբար բերման ենթարկված, այնուհետեւ ազատ արձակված երիտասարդի նկարները՝ մարմնական վնասվածքներով, որոնք, ըստ լուրերի, նա ստացել է ոստիկանական բաժանմունքում:
Այս առնչությամբ «Առավոտի» հետ զրույցում «Իմ քայլը» խմբակցության պատգամավոր, ԱԺ պաշտպանության եւ անվտանգության հարցերի հանձնաժողովի անդամ Քրիստինե Պողոսյանն ասաց, որ ոստիկանությունը ամեն ինչ ճիշտ է արել, սխալն այն էր, որ ուշացած էր Քննչական կոմիտեի պարզաբանումը. «Նրանք ճիշտ ժամանակին անհրաժեշտ ու ճիշտ ինֆորմացիա չտալով, սպասելով՝ խնդիրների առաջ են կանգնում, որից կարող էին խուսափել: Ես հասկանում եմ, որ ոստիկանությունը մի քիչ կաշկանդված է, հաճախ նախաքննության գաղտնիք չհրապարակելու համար հապաղում են, լուր չեն տալիս, որ չխանգարի գործընթացին: Բայց շատ ԶԼՄ-ներ հմուտ օգտագործելով իրավիճակը՝ այլ աստառ տվեցին: Գործը շատ լոււրջ էր՝ թմրանյութեր, կրակոցներ: Մեր հանձնաժողովը գրեթե մեկ ամիս հետեւում էր այդ ողջ գործընթացին ու բնականաբար մենք չէինք բարձրաձայնում, որովհետեււ չէինք ցանկանում խանգարել այդ լուրջ պրոցեսը: Բայց դրան է՛լ քաղաքական աստառ տրվեց, է՛լ քաղաքական հետապնդում հայտարարվեց: Բնական է, բոլորի համար հասկանալի է, որ կեղծ շահարկում էր արվում, բայց այստեղ խնդիր ունի ՔԿ-ն՝ ժամանակին հայտնվելու տեսախցիկների առաջ ու ներկայացնելու կատարված լուրջ աշխատանքը»:
Հարցին, թե Քաջարանի համայնքապետը դեպքերին ի՞նչ մասնակցություն է ունեցել՝ Քրիստինե Պողոսյանն ասաց, որ նախաքննության գաղտնիք չի ուզում հրապարակել, ուստի չի պատասխանի. «Բայց վստահաբար ասում եմ՝ բոլոր մարդիկ, ովքեր մեղավոր են, պատասխանատվության կենթարկվեն»:
Կարդացեք նաև
Վարչապետ Նիկոլ Փաշինյանը, երբ Հունան Պողոսյանը նոր էր նշանակվում Սյունիքի մարզպետի պաշտոնում, ասաց, որ նա նարկո-տրաֆիկի ողնաշարը պետք է կոտրի ու պայքար մղի օլիգարխիայի դեմ: Հարցին՝ հիմա այս գործն ինչի՞ մասին է խոսում՝ չի՞ հաջողում մարզպետը դա անել՝ Քրիստինե Պողոսյանը պատասխանեց. «Տարօրինակ կլինի դա ինձանից լսել, որովհետեւ նախկին կյանքում ես եղել եմ բարիկադի մի կողմում, պարոն Պողոսյանը՝ մյուս կողմում, բայց վստահաբար այս ընթացքում, երբ տեսել ենք իր աշխատանքը, կարող եմ ասել, որ լավագույն մարզպետներց մեկն է ու ինքն իրեն հանձնարարված գործառույթը ճիշտ է կատարում: Այնտեղ բավական լուրջ խնդիրներ են լուծվել, բավական լուրջ կլանային ինտրիգներ են վերացվել, ինչը միասնական այդ թիմի աշխատանքի շնորհիվ է»:
Ինչ վերաբերում է ոստիկանական բաժնում մարդուն ծեծելուն՝ Քրիստինե Պողոսյանն ասաց, որ ինքը այլ տեղեկատվություն ունի. «Բերման ենթարկելու ժամանակ դիմադրություն է ցուցաբերել եւ դա դիմադրության արդյունքում քաշքշուկից է: Բայց եթե այլ բան է եղել, բնականաբար, ծառայողական քննությունը կպարզի»: Քրիստինե Պողոսյանի խոսքով՝ երբ ոստիկանությունը բերման է ենթարկում, պետք է հասկանալ, որ դիմադրել չի կարելի, որովհետեւ դա նրանց գործառույթն է, իրենց աշխատանքն են անում, չի կարելի խոչընդոտել ոստիկանի օրինական պահանջին. «Մենք չէինք անում: Բնական է, դիմադրելու ընթացքում, ինչ էլ անես, ունենալու ես այդ քերծվածքներն ու կապտուկները»:
Նման տեսակետ հայտնել էր նաեւ իմքայլական Արմեն Խաչատրյանը՝ ասելով, որ նման չնչին վնասվածքներ, թեթեւ կապտուկ, քերծվածք կարող է լինել ձերբակալման ընթացքում, հո ոստիկանությունը բարեգործական կազմակերպությո՞ւն չի, որ համոզելով ձերբակալի:
Մինչդեռ, մեզ հետ զրույցում «Լուսավոր Հայաստան» խմբակցության ղեկավար Էդմոն Մարուքյանն ասաց. «Դա իրավաչափ չէ, Եվրոպական դատարանն ունի հայտնի գործ, երբ մարդուն բերման են ենթարկել, տեղից տեղ տանելու ժամանակ վնասվածք է ստացել, հետո պետությունը սկսել է բացատրել, որ նա մեքենայի մեջ շարժի ժամանակ վնասվածք է ստացել: Բայց անգամ այդ պարագայում պետության վրա է պատասխանատվությունը՝ անմարդկային վերաբերմունքի եւ խոշտանգման հետ կապված: Այնքան բարձր է այդ չափանիշը սահանված, որ դա հնարավոր չի որեւէ բանով շեղել: Հետեւաբար ասել, որ դա նորմալ է… ով նման բան է ասում, նա ունի բռնատիրական ավտորիտար մտածողություն: Միայն ավտորիտար ոստիկանական երկրներում հնարավոր է արդարացվեն ոստիկանական նման գործողությունները: Այնպես պետք է բերման ենթարկեն, որ մարդը ոչ մի վնասվածք չստանա եւ ցանկացած վնասվածք ի վնաս պետության է, որովհետեւ խոշտանգումների գործերով պետությունն է ապացուցողը, որ ինքը չի խոշտանգել: Իսկ պետությունը միշտ պարտվում այդ գործերով: Պետության վրա պատասխանատվության մեծ բեռ կա եւ չի կարելի քաղաքական մակարդակում, որեւէ ձեւով դա արդարացնել: Եթե արդարացնեն, ասեն՝ ոչինչ, կարող է մի քերծվածք լինի, հաջորդ անգամ ծեծելով կտանեն: Եթե մենք նախահեղափոխական Հայաստանում դրա դեմ պայքարել ենք, դա չի նշանակում, որ հեղափոխությունից հետո եղած Հայաստանում ասենք՝ դա նորմալ է, ասենք, ոստիկանություն է, հո Կարմիր խաչը չի, էդ ի՞նչ տեքստեր են ասում»:
Հռիփսիմե ՋԵԲԵՋՅԱՆ
«Առավոտ» օրաթերթ
27.05.2020
