«Իմ քայլը» խմբակցության պատգամավոր Նազելի Բաղդասարյանը չորեքշաբթի Ազգային ժողով-կառավարություն հարցուպատասխանի ընթացքում արդարադատության նախարար Ռուստամ Բադասյանին խնդրեց ներկայացնել «Փաստահավաք հանձնաժողովի մասին» օրենքը։
Ռուստամ Բադասյանը ասաց, որ փաստահավաք խմբի ստեղծումը անցումային արդարադատության դատաիրավական ռազմավարությամբ նախատեսված իրողություններից մեկի հերթական իրագործումն է. «Առանձին մարմին է ձևավորվելու, որը ունենալու է առանձին ֆինանսավորում «Պետական բյուջեի մասին» օրենքով, և որի գործառույթն է լինելու մի քանի ուղղություններով փաստահավաք առաքելության իրականացումը։ Դրանք Հայաստանի Հանրապետությունում 1991 թվականից սկսած տեղի ունեցած ընտրությունների կեղծումների, հանրաքվեների կեղծումների և այլ իրադարձությունների մասին փաստերի հավաքագրումն է, դրա հիման վրա եզրահանգումների իրականացումը և որոշակի հետագա քայլերի ձեռնարկումը, օրինակ՝ ինչպես իրականացնել հետագա բարեփոխումները կամ ինչ վերահսկողական գործիքներ ներդնել ապագա նման բացասական երևույթների բացառումը ապահովելու համար»։
Ամի ՉԻՉԱԿՅԱՆ
