«Հիվանդության տարածման եղանակն ու բնույթը հաշվի առնելով՝ մասնագետները հիմնականում կարծում են, որ հանրային սահմանափակումները թուլացնելու արդյունքները գնահատվում են 7-14 օրում: Հետեւաբար, արդյունքները փուլերով կտեսնենք: Պահպանվող կանոնները թույլ են տալու գնահատական տալ»,-ԱԺ-կառավարություն հարցուպատասխանի ժամանակ այսօր անդրադառնալով հարցին, թե երբ է հնարավոր լինելու գնահատել փակ տարածքներում պարտադիր դիմակ կրելու արդյունքը՝ ասաց ՀՀ առողջապահության նախարար Արսեն Թորոսյանը:
Նա նշեց, որ առողջապահական համակարգի վրա բեռը մեծ է, խոսքը հատկապես այն հիվանդանոցների մասին է, որոնք կորոնավիրուսով հիվանդներին են սպասարկում. «Հզորությունների շարունակական զարգացում է ընթանում: Իհարկե, բոլորս պետք է թույլ չտանք, որ առողջապահական համակարգում կոլապս լինի»:
Արսեն Թորոսյանը նաեւ շեշտեց. «Վերջերս մեջբերել էի մի մեթոդաբանություն, ըստ որի՝ հունիսի վերջ հնարավոր է ունենանք 500 000 կորոնավիրուսով վարակված, եւ եթե այդպես լինի, մեզ 300 միլիոն դոլար հարկավոր կլինի: Բարեբախտաբար, չենք ունենա այդքան դեպք հունիսի վերջին՝ անգամ վարակվածների թվի նման ահագնացող տեմպերով:
Առողջապահական ծախսերն ամսական 1,5-ից 2 միլիարդ դրամի շրջանակում են տատանվում: Կրկնում եմ՝ բոլորս մեր վարքագիծն այնպես պետք է մշակենք, դիմակներն այնպես ճիշտ կրենք եւ ձեռքերն այնպես ճիշտ ախտահանենք, որ չկանգնենք կոլապսի առաջ»:
Կարդացեք նաև
Լուիզա ՍՈՒՔԻԱՍՅԱՆ
