«Սպասարկման ոլորտի աշխատողների մի մասը գրանցում չունի, որովհետեւ տարբեր ռեստորաններում են աշխատել, մյուս կողմից՝ եկամտի հիմնական աղբյուրը նրանց համար աշխատավարձը չէ, այլ թեյավճարը: Նրանք օրերս կառավարության դիմաց բողոքի ցույց էին անում: Մոտ 12 000 այդպիսի քաղաքացիներ դուրս են մնացել կառավարության աջակցության ծրագրերից: Որոշներն էլ երեք ամսվա համար 29 000 դրամ են ստացել: Կառավարությունը որեւէ այլ ծրագիր նախատեսո՞ւմ է այս մարդկանց համար»,-ԱԺ-կառավարություն հարցուպատասխանի ժամանակ այսօր հետաքրքրվեց «Լուսավոր Հայաստանի» պատգամավոր Կարեն Սիմոնյանը:
Փոխվարչապետ Մհեր Գրիգորյանը պատասխանեց. «Իսկապես, բարդ խնդիր եք բարձրաձայնում: Միաժամանակ հասկանանք, թե որտեղից է գալիս խնդիրը: Չձեւակերպված աշխատանքը խնդիր է այն դեպքերում, երբ անձին չենք կարող նույնականացնել: Այնուամենայնիվ, շատ սոցիալական ծրագրեր իրականացվեցին անկախ՝ անձանց գրանցված աշխատանք ունենալ-չունենալուց: Ուստի ասել, որ մենք չենք անդրադարձել նման մարդկանց, այդպես չէ: Նաեւ կոմունալներն ենք փոխհատուցել: Իսկ ձեր մատնանշած խմբի անձանց մասին, այո, մտածում ենք, թե ինչպես կարելի է եղած կամ առանձին միջոցառումները լրացնել: Այս պահին չեմ կարող ասել, որովհետեւ նրանք չգրանցված աշխատողներ են: Ի դեպ, ձեր մատնանշած մարդկանց թվում կային աշխատողներ, որոնք ստացել են աջակցություն»:
Լուիզա ՍՈՒՔԻԱՍՅԱՆ
