«Իհարկե, կան դեպքեր, որ հարկը 2-3 անգամ ավելանում է, բայց դա արդարացի ենք համարում, որովհետեւ այսօր մեծ դղյակներ կան, որոնք տարեկան վճարում են 800 հազար դրամ, բայց օրենքի փոփոխությունից հետո պետք է 15 միլիոն դրամ վճարեն: Ակնհայտ է, որ այդ սեփականատերերի համար ոչ մի բան է դա, եթե նա այդպիսի դղյակ է կառուցել, այդպես էլ պետք է լինի»,-այսօր կառավարության նիստում անդրադառնալով գույքահարկի եւ վարչական իրավախախտումների վերաբերյալ փոփոխության նախագծին` ասաց վարչապետ Նիկոլ Փաշինյանը:
Նրա խոսքով, պետական բյուջեի նկատմամբ կա երկու վերաբերմունք` երբ պետական համակարգը դա համարում է իրենը, իսկ հանրությունը բյուջե վճարած ամեն մի կոպեկ համարում է կորսված փող. «Դա մեր համախառն ազգային գրպանն է, եւ մենք պետական բյուջեին պետք է վերաբերվենք այնպես, ինչպես վերաբերվում ենք ընտանեկան բյուջեին»:
Ըստ Նիկոլ Փաշինյանի՝ «Այո, գույքահարկն ավելանալու է, բայց առավելապես ավելանալու է այն գույքերի վրա, որը մենք պայմանականորեն անվանում ենք դղյակներ ու ապարանքներ: Եթե այսօր նայում ենք այդ մեծադղիրդ առանձնատներն ինչ գույքահարկ են վճարում, ըստ էության, սիմվոլիկ: Այստեղ ճոխության հարկի բաղադրիչ նույնպես կա: Հիմա մարդիկ տներ կառուցում են առանց որեւէ հարակից գործոն հաշվի առնելու, ինչքան մեծ, ինչքան բարձր, ինչքան ուրիշներին ճնշող, այնքան ավելի լավ: Եթե այդպես է, ուրեմն պետք է վճարեն այդպիսի սեփականություն ունեցողները»:
Փաշինյանի տվյալներով, առաջին տարում 500 հազար շահառուների գույքահարկը կպակասի, իսկ հաջորդ տարվանից կսկսի կամաց-կամաց ավելանալ. «Այսինքն՝ 2021 թվականը ճգնաժամային տրամաբանության մեջ կլինի, հետագայում բարձրացումները կլինեն իրավիճակին համարժեք: Մենք դուրս ենք բերել կամայական հասցեներ եւ համեմատել ենք այսօրվա գույքահարկի կիրառումը ապագա գույքահարկի հետ: Մենք զուտ բանաձեւով ստանում էինք դեպքեր, երբ գույքահարկը 300-400 անգամ բարձրանում է: Որոշեցինք տեղայնացնել եւ պարզեցինք, օրինակ, որ դա այն դեպքերն են, երբ ասենք այսօր վճարվում է 1 դրամ, օրենքի փոփոխությունից հետո պետք է վճարի 300 դրամ: Կամ որ դեպքում է, որ 200 տոկոսով աճում է հարկը, դա այն դեպքն է, որ ասենք հիմա վճարում է 500 դրամ, բայց պետք է վճարի 1000 դրամ»:
Կարդացեք նաև
Լուսինե ԲՈՒԴԱՂՅԱՆ
