«Այս պահին տեղի է ունենում շատ հարազատ մարդու հուղարկավորությունը, որին մասնակցելու հնարավորություն չունեմ՝ համավարակի պատճառով: Դրա անտեսանելի շղթայով կապված ենք բոլորս: Կվարակվեմ, թե ոչ, չգիտեմ, ու չգիտեմ, թե այդ շղթայի վերջում ինչպիսի լուսավոր մարդ է կանգնած եւ արդյոք նա կհաղթահարի՞ այն, թե ոչ»,-ԱԺ ամբիոնից այսօր օրինագծերից մեկի զեկուցման ժամանակ ասաց ՀՀ տարածքային կառավարման եւ ենթակառուցվածքների փոխնախարար Լիլյա Շուշանյանը:
Հիշեցնենք, որ ԱԺ նիստերի դահլիճում դիմակ կրելու հետ կապված այսօր բանավեճ եղավ իշխանական եւ ընդդիմադիր պատգամավորների միջեւ:
Շուշանյանը դողացող ձայնով ու հուզվելով շարունակեց դիմել ազգային ժողովին. «Խնդրում եմ, որ բոլորս հերոսանանք՝ ոչ թե ինքնազոհությամբ կամ պատվաստանյութի սպասելով, այլ համազգային հոգատարությամբ՝ անգամ նրանց հանդեպ, ում երբեւէ չեք ճանաչել, որովհետեւ այդ շղթան նրանց էլ կարող է տանել: Մեկ շաբաթ առաջ ինձ համար առաջնահերթ բոլոր բժիշկներն էին հերոսներ, իսկ հիմա հերոսներ են այն քաղաքացիները, որոնք բժիշկների համար գործ չեն ավելացնում: Խնդրում եմ հերոսանալ»:
Լուիզա ՍՈՒՔԻԱՍՅԱՆ
