Ռոբերտ Քոչարյանի եւ մյուսների գործով դատական նիստի հետաձգվելուց հետո ԶԼՄ-ների հետ զրույցի ընթացքում լրագրողի դիտարկմանը, թե մեղադրող կողմը Ռոբերտ Քոչարյանի փաստաբանական խմբին մեղադրում է դատական նիստերը ձգձգելու մեջ, ՀՀ 2-րդ նախագահի փաստաբանական խմբի անդամ, սահմանադրագետ Արամ Վարդեւանյանը պատասխանեց. «Կրկին ցանկանում եմ հիշեցնել, որ երկու ամսից ավելի դատական նիստերը չեն կայացել մեկ անձի պատճառով: Դա Աննա Դանիբեկյանն է: Խնդրում եմ, որ այդ հանգամանքին լրջագույն ուշադրություն դարձնեք: Դատախազներին խնդրեք՝ թող պարզաբանեն, թե մեր պատճառով քանի՞ դատական նիստ չի կայացել: Մենք կարող ենք համեմատել երկու ամիս դատական նիստեր ուղղակի չանելու իրավիճակի հետ: Կամ ավելի հետաքրքիր բան ասեմ: Դուք կհիշեք, որ նույն Աննա Դանիբեկյանը դեկտեմբերի 10-ից արձակուրդ էր մեկնում: Եվ դա այն պարագայում, երբ նա գիտակցում էր, որ իր վարույթում կա կալանավորված անձ:
Եվրոպական դատարանը հարյուր չէ՝ հազար անգամներ է ասել, որ երբ կա կալանավորված անձ, դատարանը ինչպիսի ջանասիրություն պետք է դրսեւորի: Նորից եմ ասում եւ սա շատ հստակ եմ ուզում ընդգծել. ցանկացած առողջական ռիսկ, որը տեղի է ունենում, ու նաեւ պայմանավորված է կալանավորման հանգամանքով, պատասխանատուներից մեկը լինելու է Աննա Դանիբեկյանը»:
Աշոտ ՀԱԿՈԲՅԱՆ
