«Չպիտակավորեմ հանձնաժողովում երեկվա իրավիճակը, բայց տարօրինակ բան կատարվեց՝ սկզբում 4 կողմ եւ 2 դեմ ձայներով որոշումն անցավ, հետո ինչ-որ վերաքվեարկություն կազմակերպվեց, եւ որոշումը չանցավ»,-ԱԺ ամբիոնից այսօր հայտարարեց ԲՀԿ պատգամավոր Գեւորգ Պետրոսյանը:
Հիշեցնենք, որ երեկ պետաիրավական հարցերի հանձնաժողովը բացասական եզրակացություն տվեց նրա եւ ԲՀԿ մյուս պատգամավորների հեղինակած օրինագծին, որով առաջարկվում էր պատիվն ու արժանապատվությունը վիրավորելու, զրպարտելու դրվագներով քաղաքացիական գործերը դատարանում քննել սեղմ ժամկետներում: Օրինագծի քննարկման ժամանակ Գեւորգ Պետրոսյանի եւ «Իմ քայլի» պատգամավոր Նիկոլայ Բաղդասարյանի միջեւ վեճ էր եղել:
Այսօր Գեւորգ Պետրոսյանը նկատեց. «Երեկ խոսակցություն եղավ, թե ես վիրավորել եմ որեւէ դատավորի: Նման բան չի եղել, դա բանսարկություն է: Ես վիրավորելուց միանգամից եմ ասում, բայց նման բան չի եղել»:
Կարդացեք նաև
Ապա ԱԺ պետաիրավական հարցերի հանձնաժողովի անունից «Իմ քայլի» պատգամավոր Արթուր Դավթյանը պարզաբանեց. «Չնայած ես համակարծիք եմ պարոն Պետրոսյանի հետ, որ այս օրինագիծն անհրաժեշտություն է, կողմ եմ քվեարկել, բայց հանձնաժողովը դեմ է քվեարկել: Մի անգամ եղավ քվեարկություն, մասնակցեց տասը պատգամավոր, որոնցից չորսը կողմ քվեարկեց, երեքը՝ դեմ, երեքը՝ ձեռնպահ: Դա նշանակում է, որ օրինագիծը չի անցել, որովհետեւ կանոնակարգի համաձայն՝ քվեարկողների թվի մեծ մասը, այսինքն՝ վեց հոգի, պետք է «կողմ» քվեարկի, որպեսզի նախագիծն անցնի»:
Գեւորգ Պետրոսյանն արձագանքեց. «Եթե չէիք ուզում, որ օրինագիծն անցնի, դա ուրիշ բան, բայց առաջին քվեարկությունից հետո ո՞վ է տեսել նման բան: Չեք ուզում, ասեք՝ չենք ուզում, բայց առաջին քվեարկությամբ օրինագիծն անցել էր, հետո շուռ եկաք ու ասացիք, որ պետք է վերաքվեարկեք, ու ստացվեց, որ դեմ եք: Մնացածը թողնում եմ գործընկերների խղճին»:
Հանձնաժողովի նախագահ, «Իմ քայլի» պատգամավոր Վլադիմիր Վարդանյանը պատասխանեց. «Որպեսզի տեսնեիք, որ քվեարկությունը ոչ թե երկու, այլ մեկ անգամ է եղել, պետք է մինչեւ վերջ նստեիք սրահում (երեկ Գեւորգ Պետրոսյանը քվեարկության պահին պատրաստվում էր դուրս գալ սրահից.-խմբ): Այո, շփոթություն է եղել, որովհետեւ քարտուղարությունը ձայները սխալ է հաշվարկել, հետո տարրական հաշվարկով պարզ դարձավ, որ եղել է 4 կողմ, 3 դեմ եւ 3 ձեռնպահ ձայն: Իսկ այդ հարաբերակցությամբ չի կարող որոշումն ընդունվել: Բանավոր նկատողություն եմ տվել քարտուղարությանը: Տասը պատգամավորի դեպքում վեց կողմ ձայն պետք է լիներ»:
Ապա Գեւորգ Պետրոսյանի եւ ԲՀԿ մյուս պատգամավորների օրինագիծը ԱԺ լիագումար նիստերի օրակարգում ներառելու հարցը դրվեց քվեարկության: «Կողմ» քվեարկեց 33, դեմ՝ 70 եւ ձեռնպահ՝ 2 պատգամավոր, իսկ սա նշանակում է, որ օրինագիծը չի ներառվի ԱԺ լիագումար նիստի օրակարգում:
Լուիզա ՍՈՒՔԻԱՍՅԱՆ
