«Իրատեսի» հյուրն է ԱԺ նախկին պատգամավոր ՍԱՄՎԵԼ ՖԱՐՄԱՆՅԱՆԸ։
–Համավարակի պատճառով ստեղծված ճգնաժամային իրավիճակը, ըստ Ձեզ, կառավարելի՞ է։ Հաշվի առնելով վարակի տարածման այսօրվա տեմպերը, ինչի՞ առջև կարող է երկիրը կանգնել։
-Հայաստանը կանգնած է մոտալուտ ազգային աղետի շեմին։ ՈՒ այս ամենը մի մարդու իշխանության արդյունքում, որը խոստացել էր վերացնել աղետի գոտին։ Արդյունքում Նիկոլ Փաշինյանն այսօր ողջ Հայաստանն է վերածում աղետի գոտու։ Թշնամին ու օտար նվաճողը երևի մեր երկրի հետ այսպես օտարավարի ու անպատասխանատու կերպով չէին վարվի։ Այսօր գնում ենք հենց այս ուղղությամբ։ Վարակի տարածման վիճակագրությունը և իշխանության կառավարչական ապաշնորհությունն այդ մասին են խոսում։ Նայե՛ք վարակի տարածման վիճակագրությանը, մահվան ցուցանիշներին, այս ամենի օրական դինամիկային։ Իրավիճակը ոչ միայն բացարձակ վերահսկելի չէ իշխանության կողմից, այլև արդեն անիրատեսական էլ է սպասել, որ գործող կառավարությունը կարող է ինչ-որ հրաշքով այն վերահսկողության տակ առնել։ Բարձիթողի ու կատարյալ քաոտիկ իրավիճակ։ Տպավորությունն այնպիսին է, որ ժողովուրդն իր ինքնապահպանման անխախտ բնազդով շատ ավելի արդյունավետ կկարողանար պայքարել համավարակի դեմ, եթե ընդհանրապես չլինեին կառավարությունն ու նրա հակասական և մանկամիտ պահվածքը։ Ավելին, ստեղծված իրավիճակը, գրանցված ու դեռ գրանցվող մահերը բացառապես գործող իշխանությունների խղճին են։ ՈՒ դեռ գալու է ժամանակը, երբ այս ամենը փաստարկված կերպով, թղթապանակների վերածված, դառնալու է Նիկոլ Փաշինյանի հանցավոր անգործությունն ապացուցող քրեական գործերի նյութ և խորհրդարանական ու այլ հանձնաժողովների ուսումնասիրության առարկա։
–Վարչապետը խոստովանեց, որ կորոնավիրուսի հարցում «մեր գործերը լավ չեն»։ Բացի փաստն արձանագրելուց, ի՞նչ պիտի հետևեր դրան։
Կարդացեք նաև
-Մամուլն ու պարետատան գրասենյակները հեղեղված են տարբեր մասնագիտական առաջարկներով, առկա է հաջողված համաշխարհային փորձ, կա կուտակված գիտելիք։ Պետք էր ի սկզբանե չդրսևորել նման հանցավոր ամբարտավանություն և լսել մարդկանց, որոնք իրենից խելոք են։ Այսօրվա կառավարության կազմում ևս նման մարդիկ կան։ Ողջ տարածաշրջանն այսօր արդեն խոսում է «վրացական հրաշքից», թե ինչպես մեր հարևան երկրին հաջողվեց նման դրական արդյունք գրանցել։ Երեկ արդեն այդ երկրում, որի բնակչությունն ու չափսերը մոտավորապես համադրելի են Հայաստանի հետ, արձանագրվել է վարակի ընդամենը մեկ դեպք։ Թե չէ, քանի՞ կոպեկ արժի Նիկոլ Փաշինյանի նման արձանագրումը, թե մեր գործերը լավ չեն։ Դա ամեն մի քաղաքացի առանց նրա ասելու էլ շատ լավ հասկանում է։ Բայց հանուն ճշմարտության մի բան էլ արձանագրենք. Նիկոլ Փաշինյանը վաղուց ապացուցել է, որ ինքը ունակ չէ որևէ հարցում, որևէ ուղղությամբ հաջողության հասնելու։ Նա պրոֆեսիոնալ քանդարար է, մեծ աղմկարար ու նույնքան մեծ խառնակիչ։ Իսկ համավարակի դեմ պայքարում հաջողության չես հասնի ո՛չ քանդելով, ո՛չ աղմկելով ու ո՛չ էլ մեծ խառնակչությամբ։ Սա է իրականությունը։ ՈՒ եթե վարչապետի պաշտոնում միամիտ հայտնված մարդը մեկ բան կարող է անել (իրականում օգնելու երկրին, գոնե փորձելու խուսափել վերահաս ազգային աղետից), դա րոպե առաջ հրաժարականի դիմում գրելն է, որով հնարավորություն կտա երկրին` փորձել դուրս գալ ստեղծված աղետալի իրավիճակի ճիրաններից։
Զրույցը՝ Ռուզան ԽԱՉԱՏՐՅԱՆԻ
Հոդվածն ամբողջությամբ՝ «Իրատես» թերթի այսօրվա համարում:
