Փոխվարչապետ, պարետ Տիգրան Ավինյանի որոշմամբ՝ այսօրվանից մինչեւ հունիսի 3-ը ժամը 23։59-ը սահմանափակումներ են կիրառվելու Գեղարքունիքի մարզի Սեւան hամայնքում: Խիստ սահմանափակումներ են կիրառվելու տնտեսական գործունեության ոլորտում, արգելվում է քաղաք ելումուտը։
Aravot.am-ն այսօր առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ի վարակիչ հիվանդությունների համաճարակաբանության բաժնի պետ Լիանա Թորոսյանին խնդրեց մանրամասնել՝ Սեւանում կորոնավիրուսի օջախն ինչպե՞ս է բռնկվել, արդյոք հանրային միջոցառումներ՝ հարսանիք, հուղարկավորություն կամ մեծաքանակ մարդկանցով ծնունդներ են եղել: Նաեւ հետաքրքրվեցինք՝ ե՞րբ են Սեւան քաղաքում կորոնավիրուսի զանգվածային դեպքեր գրանցվել, եւ ինչո՞ւ ավելի շուտ քաղաքում խիստ միջոցառումներ չիրականացվեցին, քանի որ մեր տեղեկություններով, մոտ տաս օր առաջ այնտեղ դեպքերն արդեն շատ էին:
Ի պատասխան մեր՝ վարակի բռնկման պատճառի մասին հարցի, Թորոսյանն ասաց. «Դա կարող է լինել մարզում ձեւավորված օջախների շարունակականությունը եւ այդպես հարցը ձեւակերպել, թե վերջին անգամ երբ են դեպքեր արձանագրվել… դեպքերը հիմա արձանագրվում են, եւ հիվանդությունն ինքնին նոր հիվանդություն է եւ չենք կարող համեմատական անցկացնել անցյալի եւ ներկայի պարագայում»:
Նկատենք, սակայն, որ մեր հարցը վերաբերում էր ոչ թե պարզապես մեկ-երկու դեպքի գրանցմանը, այլ՝ մասսայական, եւ Թորոսյանն, ըստ էության, մեր հարցին կոնկրետ պատասխան չտվեց, ինչպես նաեւ կոնկրետ պատասխան չտվեց մեր մյուս հարցին՝ ավելի վաղ խիստ սահմանափակումներ կիրառելու վերաբերյալ:
Կարդացեք նաև
«Միջոցառումները մշտապես են իրականացվել, միջոցառումներն իրականացվել են բոլոր մարզերի եւ համայնքների համար, ուղղակի այստեղ նաեւ մարդկային գործոնի խնդիր է, որ բոլորս պետք է աչալուրջ ու զգոն լինենք, ու հիվանդությունը դիտարկենք ավելի շատ վարքագծային հիվանդություն, որ կարողանանք իրավիճակը կայունացնենք»,-ասաց Թորոսյանը:
Նշենք, միջոցառումներ այո, իրականացվում են, բայց մենք հարցում հստակ նշել էինք՝ խիստ սահմանափակումներ, այնպիսին, ինչպիսին հիմա են կիրառում:
Նելլի ԲԱԲԱՅԱՆ
