«Այս միջադեպը հանրային ուշադրության լուրջ կարիք ունի, քանի որ գործ ունենք տարիներ շարունակ իրավաբանական գործունեություն ծավալած անձի հետ»,-«Հայելի» մամուլի ակումբում լրագրողների հետ հանդիպմանն այսօր անդրադառնալով փաստաբան Տիգրան Աթանեսյանի ընտանիքի վրա հարձակման դեպքին՝ ասաց իրավապաշտպան Ռուբեն Մելիքյանը:
Նա նշեց, որ Աթանեսյանը տարբեր ժամանակներում իշխանության ընդդիմախոսներին պաշտպանելու մեծ փորձ ունի. «Իշխանությունից եւ իրավասուներից պահանջում ենք ուշադրության կենտրոնում պահել միջադեպը»:
Ռուբեն Մելիքյանի խոսքով. «Այս ամենը հանդուրժել այլեւս հնարավոր չէ: Իրավաբանների համայնքը պետք է համերաշխություն հայտնի Տիգրան Աթանեսյանին: Հարյուրավոր, գուցե հազարավոր մարդիկ վրդովված են կատարվածից: Աթանեսյանի հանդեպ ատելության առաջին ալիքը եղավ 2018թ.-ին, երբ նա ստանձնել էր Մասիսի քաղաքապետի պաշտպանությունը: Հիմա էլ ընտանիքի հանդեպ է ֆիզիկական հարձակում լինում: Այս ամենի եւ իշխանության ներկայացուցիչների, մասնավորապես՝ վարչապետի բառապաշարի միջեւ կապ չլինել չի կարող: «Սամասուդի» մասին արտահայտությունները, ԱԺ-ի ծեծկռտուքը… այդ ամենը չի կարող պատճառահետեւանքային կապ չունենալ»:
Լուիզա ՍՈՒՔԻԱՍՅԱՆ
