Այսօր Ազգային ժողովի Պետական-իրավական հարցերի մշտական հանձնաժողովի նիստում քննարկվեց պատգամավոր Արման Բաբաջանյանի «Հայաստանի Հանրապետության դատական օրենսգիրք» Հայաստանի Հանրապետության սահմանադրական օրենքում փոփոխություն եւ լրացում կատարելու մասին հարցը:
Պատգամավորի խոսքով, փոփոխությամբ նախատեսվում է Դատական օրենսգրքի 98-րդ հոդվածի 5-րդ մասում կամ «հետբուհական լրացուցիչ կրթական ծրագիր իրականացնող կազմակերպություն» բառերի փոխարեն լրացնել Արդարադատության ակադեմիա պետական ոչ առեւտրային կազմակերպության եւ Հայաստանի հանրապետության Փաստաբանական դպրոց անվանումները:
Արդարադատության նախարարի տեղակալ Վահե Դանիելյանն ասաց, որ իրենք էլ առաջարկել են «լրացուցիչ կրթական ծրագրերի» փոխարեն լինի Արդարադատության ակադեմիայում եւ փաստաբանական դպրոցում ուսանելու հարցը եւ այս փուլում առարկություններ չունեն: Որոշումն ընդունվեց միաձայն եւ այն ընդգրկվեց գալիք նիստերի օրակարգ:
Փոփոխությամբ նպատակ է հետապնդվում միաժամանակ ապահովելու գիտական եւ գործնական հարթություններում առավել հմտացած եւ փորձառու իրավաբանների ներգրավումը որպես դատավորներ, սակայն ինչպես օրենքի հիմնավորման մեջ է նշված, առաջանում է այդչափ խիստ պահանջները դատավորների թեկնածուներին վերաբերող ընդհանուր պահանջների հետ համադրելու եւ դրանք միասնական համակարգային տրամաբանության մեջ տեղավորելու անհրաժեշտություն, ինչը համակարգային տրամաբանության տեսանկյունից այդ մոտեցումն անհասկանալի է:
Կարդացեք նաև
«Կան կազմակերպություններ, որոնք առավել նեղ մասնագիտական կրթական ծրագիր են իրականացնում, սակայն չեն հանդիսանում բարձրագույն ուսումնական հաստատություն, որքանով որ չեն տեղավորվում «Բարձրագույն եւ հետբուհական կրթության մասին» Հայաստանի Հանրապետության օրենքով տրված «բարձրագույն ուսումնական հաստատություն» հասկացության մեջ, ինչպես օրինակ «Դատախազության դպրոց» ՊՈԱ կազմակերպությունն է եւ «Հայաստանի Հանրապետության փաստաբանական դպրոց» հիմնադրամի կարգավիճակ ունեցող ոչ առեւտրային կազմակերպությունն է: Առաջարկվող նախագծով գիտական հարթությունում փորձառու իրավաբանների որպես դատավորներ ներգրավման նպատակի համար կարող է բավարար լինել գիտական աստիճան ունենալը եւ գիտական հաստատությունում գիտական աշխատանք կատարած լինելը, իսկ գործնական հարթությունում՝ առնվազն հինգ տարվա մասնագիտական փորձառությունը, որը ներառում է նաեւ բարձրագույն ուսումնական հաստատություններում եւ հետբուհական կամ լրացուցիչ կրթական ծրագիր իրականացնող այլ կազմակերպությունում դասավանդման ժամանակահատվածը»,-ասված է հիմնավորման մեջ:
Լուսինե ԲՈՒԴԱՂՅԱՆ
