Լրատվամիջոցների ազատության և լրագրողների անվտանգության հարցերով ԵԽԽՎ գլխավոր զեկուցող Ստեֆան Շենախը իր մտահոգությունն է հայտնել Ադրբեջանում և Թուրքիայում լրագրողների ձերբակալությունների կապակցությամբ: ԵԽԽՎ զեկույցի համաձայն՝ բանտարկված լրագրողների թվով առաջատար է Թուրքիան, որտեղ ազատազրկման մեջ է գտնվում 95 լրագրող:
«Լրագրողները ենթարկվում են կամայական ձերբակալության, կալանքի, նրանք անազատության մեջ են մնում ամիսներ շարունակ, երբեմն նաև մի քանի տարի, նախքան նրանց գործերը կհասնեն դատարան: Այդ ձերբակալությունները լրագրողների քաղաքական հետապնդման հետևանք են՝ քննադատական ռեպորտաժների համար, ինչը խոսքի ազատության, լրագրողների իրավունքների ոտնահարում է»,-շեշտել է Շենախը:
Ինչ վերաբերում է Ադրբեջանին, այստեղ անազատության մեջ է գտնվում 10 լրագրող՝ կեղծ մեղադրանքների հիման վրա: «Թուրքիայում և Ադրբեջանում ներկայիս իրավիճակն անընդունելի է: Այս երկրներում տարիներ շարունակ ոտնահարվել են զանգվածային լրատվամիջոցների իրավունքները: Այդ պատճառով Թուրքիային և Ադրբեջանին կոչ եմ անում հնարավորինս շուտ դադարեցնել հարձակումները լրագրողների դեմ, հավատարիմ մնալ Եվրոպայի Խորհրդի չափորոշիչներին, ինչպես նաև Կազմակերպության արժեքներին»,-եզրափակել է ԵԽԽՎ գլխավոր զեկուցողը:
Պատրաստեց՝ Վիկտորյա ԱՆԴՐԵԱՍՅԱՆԸ
