Ադրբեջանի ԱԳՆ-ն անդրադարձել է ՀՀ ԱԳՆ մամուլի խոսնակ Աննա Նաղդալյանի մեկնաբանությանը Արցախի նորընտիր նախագահի երդմնակալության արարողության վերաբերյալ:
Աննա Նաղդալյանը, շնորհավորելով Արցախի ժողովրդին ժողովրդավարական գործընթացների արդյունքում իշխանություն ձևավորելու կապակցությամբ, մասնավորապես ասել էր. «Պատերազմի սպառնալիքները և ռազմատենչ կեցվածքը՝ լինեն դրանք հայտարարությունների, թե միջազգային հանձնառությունների խախտմամբ անցկացվող լայնամասշտաբ զորավարժությունների տեսքով, Ադրբեջանի ոչ կառուցողական դիրքորոշման ավանդական բաղադրիչներն են, որոնք որևէ ազդեցություն չեն կարող ունենալ ղարաբաղյան հիմնահարցում հայկական կողմերի դիրքորոշումների և Արցախում տեղի ունեցող ժողովրդավարական գործընթացների վրա»:
ՀՀ ԱԳՆ-ի մամուլի խոսնակը համանման հայտարարությամբ հանդես էր եկել այն բանից հետո, երբ Ադրբեջանի ԱԳՆ-ն անդրադարձել էր Արայիկ Հարությունյանի երդմնակալության արարողությանը:
Ադրբեջանի ԱԳՆ-ի մամուլի խոսնակ Լեյլա Աբդուլաևան, անդրադառնալով ժողովուրդների ինքնավարության սկզբունքին ասել է, որ «Հայաստանի ԱԳՆ-ն պետք է կարդա Հելսինկիի եզրափակիչ ակտը, այնուհետև հիմնվի դրա վրա»:
Կարդացեք նաև
Նրա խոսքով` «այն փաստը, որ Հայաստանի ԱԳՆ-ն Արցախում տեղի ունեցած ընտրությունները անվանում է ժողովրդավարական գործընթաց, ցույց է տալիս այդ պետության իսկական էությունը»:
Պատրաստեց` Վիկտորյա ԱՆԴՐԵԱՍՅԱՆԸ
