ԱԺ առողջապահության եւ սոցիալական հարցերի հանձնաժողովի նիստում այսօր քննարկվում է «Հոգեբուժական օգնության մասին» օրենքում փոփոխությունների օրինագիծը:
Ինչպես հայտնեց ՀՀ առողջապահության փոխնախարար Անահիտ Ավանեսյանը՝ օրինագիծը սահմանում է հոգեկան առողջության խնդիրներ ունեցող անձանց իրավունքները՝ անկախ նրանց գտնելու վայրից, հոգեբուժական կազմակերպություններում գտնվողների իրավունքների սահմանափակման ձեւերը եւ կարգը:
Փոխնախարարի խոսքով՝ առաջին անգամ սահմանվել են հոգեկան առողջության խնդիրներ ունեցողների մեկուսացման եւ հանդարտեցման միջոցների կիրառման կարգը եւ տեւողությունը:
«Հոգեբուժական ծառայությունները հոգեբուժական օգնություն կիրականացնեն պայմանագրի շրջանակում, որում չընդգրկված բուժօգնության ծավալը կիրականացվի վճարովի հիմունքներով: Առաջին անգամ սահմանվել է նաեւ ընտանեկան բժիշկների կողմից հոգեբուժական ծառայություն տրամադրել: Սահմանվել են նաեւ ոչ հոժարակամ հոսպիտալացման հիմքերը, ոչ հոժարակամ բուժման առավելագույն ժամկետները եւ կարգը: Ոչ հոժարակամ հոսպիտալացման կարգի խախտման համար հոգեբույժների հանդեպ սահմանվել է պատասխանատվության ենթարկում»,-նշեց Անահիտ Ավանեսյանը:
Կարդացեք նաև
Հավելենք, որ օրինագիծն առաջիկայում պետք է քննարկվի ԱԺ լիագումար նիստում:
Լուիզա ՍՈՒՔԻԱՍՅԱՆ
