ԱԺ առողջապահության եւ սոցիալական հարցերի հանձնաժողովի նիստում այսօր քննարկվեց «Իմ քայլի» պատգամավոր Սիսակ Գաբրիելյանի հեղինակած՝ «Դեղերի մասին օրենքում» փոփոխությունների օրինագիծը, որն ԱԺ լիագումար նիստում առաջիկայում պետք է քննարկվի երկրորդ ընթերցմամբ եւ ամբողջությամբ:
Հիշեցնենք, որ ըստ օրինագծի՝ կթույլատրվի արտասահմանից փոստով որեւէ դեղ ստանալ:
Գաբրիելյանը հայտնեց փոփոխությունը, որն ամրագրվել է օրինագծում. միջազգային փոստային փոխադրումներով ֆիզիկական անձի անունով դեղ ստանալիս քաղաքացին մաքսային ծառայություն ներկայանալուց առաջ պետք է թույլտվություն ստանա միայն այն դեղերի համար, որոնք ՀՀ-ում գրանցված չեն:
«Թույլտվությունը ստանալու համար պետք է դիմել առողջապահության նախարարություն: Անձնական օգտագործման դեղերի պարագայում երկիր մտնելիս կամ դուրս գալիս թույլտվություն պետք չէ»,-նշեց Սիսակ Գաբրիելյանը:
Կարդացեք նաև
Նա վստահ է, որ օրենքի ընդունումն օգտակար է լինելու, որովհետեւ քաղաքացիները պարբերաբար դիմում են եւ բարձրաձայնում, որ պետությունների սահմանների փակ լինելու պատճառով որեւէ մեկին չեն կարողանում խնդրել արտասահմանից այս կամ այն դեղը բերել կամ ուղարկել:
Կառավարության դիրքորոշումն այս օրինագծի վերաբերյալ դրական է:
Լուիզա ՍՈՒՔԻԱՍՅԱՆ
