ՀՀ ԱԺ «Իմ քայլը» խմբակցության պատգամավոր Հովհաննես Իգիթյանն Aravot.am-ի հետ զրույցում ասաց, որ իր համար զարմանալի է այն, որ իր դիտարկումներին որոշել է պատասխանել ՀՀԿ երիտասարդական կազմակերպության ղեկավար Հայկ Մամիջանյանը, քանի որ ինքն իր կարծիքը հայտնելիս նրա անունը չի տվել: Այնուհետև ասաց, որ նրա մեկնաբանություններում առնվազն երեք ոչ կոռեկտ, իրականությանը չհամապատասխանող հարցեր կան:
Հիշեցնենք՝ Հայկ Մամիջանյանը պնդել էր, թե Հովհաննես Իգիթյանը միջնորդ պատգամավոր էր գտել, որ ընդգրկվի արտաքին կապերի հանձնաժողովին կից գործող փորձագիտական հանձնաժողովում: Այս առիթով Հովհաննես Իգիթյանը պարզաբանեց. «Պարզ է, որ ես ոչ մեկին չեմ խնդրել այդ հանձնաժողովում ընդգրկվելու համար, և նման մեխանիզմ գոյություն չուներ: Ես կասեի հակառակը՝ ինձ խնդրել են որպես միջազգային փորձագետ լինել այդ հանձնաժողովի անդամ: 2016-2017-ականներին ես աշխատում էի դրսում, բավականին հաջողված, բարձր վճարվող միջազգային փորձագետ էի: Առողջության հետ կապված Հայաստանում էի: Այդ ժամանակ ինձ զանգեց իմ մտերիմ պատգամավորը ԱԺ-ից և ինձ ասաց՝ հիմա կկապնվեն արտաքին հարաբերությունների հանձնաժողովից, ասաց, որ ԵԽԽՎ-ում իրավիճակը շատ ծանր է, ադրբեջանցիներն անցկացրել են մի քանի հակահայկական բանաձևեր, իմ փորձը կարող է օգնել Հայաստանին:
Ես իմ բացասական կարծիքն ասացի հանձնաժողովի նախագահի՝ Արմեն Աշոտյանի մասին, ասացի, որ ուզում եմ հեռու մնալ ՀՀ-ի այսպիսի իրավիճակից: Բայց իմ մտերիմ պատգամավորն ասաց, որ չմերժեմ, գնամ և տեսնեմ՝ ինչպես են աշխատում: Տեսա, որ այդտեղ կան իմ կողմից հարգված փորձագետներ և որոշեցի գնալ: Սա էր ընդհանուր պատմությունը: Զավեշտալի կարելի է համարել, որ ես պետք է միջնորդ գտնեի Աշոտյանի հանձնաժողովում ինչ-որ մի տեղ, կամ ինչպես իրենք են ասում փորձագետ լինելու համար: Ինձ փորձում են մեղադրել, որ ես եղել եմ արտաքին հարաբերությունների, Աշոտյանի գլխավորած հանձնաժողովին կից այդ փորձագիտական խմբում: Դա համարվում է որպես բացասական երևույթ, որ ես կարող էի լինել այդ խմբի անդամ: Ընդունում եմ, որ ընդհանրապես որևէ առնչություն ունենալը հանրապետականների հետ, բացասական է, բայց ինձ խնդրեցին որպես միջազգային փորձագետ օգնել ՀՀ-ի իմիջի վերականգնմանը, և ես մի քանի փորձագիտական նիստերի մասնակցեցի»:
Հայկ Մամիջանյանի մյուս պնդումն այն էր, որ Հովհաննես Իգիթյանը ԵԽԽՎ-ում փոխանակ պաշտպանի Հայաստանի շահերը, պաշտպանում է խիստ կասկածելի պատվիրակված շահեր: Ի պատասխան Հովհաննես Իգիթյանն ասաց՝ գուցե նա չգիտի, թե ինչ է ԵԽԽՎ-ն և ինչպես են այնտեղ աշխատում ու հիշեցրեց՝ ինքն 90-ականների սկզբից բանակցել է ԵԽԽՎ-ի պաշտոնյաների հետ ՀՀ-ին այդ կառույցում ընդգրկելու համար. «Առաջին շահն այն է, որ մենք այնտեղ պետք է համահունչ լինենք ժողովրդավարության և մարդու իրավունքների արժեքներին: Ուրախ եմ, որ այսօր հեղափոխությունից հետո ՀՀ-ի մոդելը լիովին համահունչ է Եվրոպայի խորհրդի կանոններին և Մարդու իրավունքների եվրոպական կոնվենցիայի արժեքներին: 2008-ին ես, լինելով հետապնդվող քաղաքական հայացքների համար, ապրել եմ Ստրասբուրգում, աշխատել բանաձևերի վրա, որոնք ուղղված էին ՀՀ-ում քաղաքական դրդապատճառներով հետապնդվող մարդկանց և քաղբանտարկյալների ազատ արձակմանը: Ես պաշտպանել եմ ժողովրդավարության և մարդու իրավունքների շահերը: Անհեթեթ է այդ մեղադրանքը»:
Կարդացեք նաև
Հովհաննես Իգիթյանին հիշեցրինք՝ ՀՀԿ երիտասարդական կազմակերպության ղեկավարը, փաստելով իր՝ ՀՀԿ-ն քաղաքական աղբարկղում հայտնվելու մասին հայտարարությունը, հիշեցնում է, թե ինքը չի առաջադրվել ռեյտինգային ընտրակարգով, քանի որ զրո ձայն կհավաքեր: «Իմ քայլը» խմբակցության պատգամավորն արձագանքեց. «Քաղաքական աղբարկղի հետ կապված խնդրում եմ, թող ողջ համատեքստը կարդան: Ես նկատի ունեի, որ մի կուսակցություն, որն ուներ մի քանի հարյուր հազար անդամներ և հայտարարում էր, որ միայն իրենց ընտանիքի անդամներով, միայն կուսակցության անդամներով նրանք ՀՀ-ում ունեն 800-900 հազար ձայն, իրականում ամենաժողովրդավար և ազատ ու արդար ընտրություններում չեն հավաքում համապատասխան շեմ խորհրդարանում լինելու համար: Ես դա համարում եմ մեծ ապտակ քաղաքական կուսակցությանը և հասարակության կողմից համապատասխան գնահատական: Սա էր իմ հիմնավորումը, որ այս կուսակցությունը չի կարելի համեմատել ուղղակի արտախորհրդարանական կուսակցություններ հետ, որոնք այդպիսի հետընթաց և քաղաքական գնահատական չեն ստացել: Սա քաղաքական արխիվ, թե աղբարկղ ասենք, էական չէ, ուղղակի հիշեցի նաև այն դրվագը, որ երբ ժողովուրդը պատրաստվում էր ֆիզիկապես այդ մարդկանց գցել աղբարկղ, Իմ քայլի ղեկավարությունը, մենք ամեն ինչ անում էինք, որ ֆիզիկական որևէ գործողություններ չլինի, և առավելագույնը մարդկանց նկարներն էին հայտվում աղբարկղերում: Թող հիմա ՀՀԿ-ականները ուժ գտնեն իրենց մեջ և այդ վերլուծությունն անեն, թե ինչու իրենք չհայտնվեցին խորհրդարանում և մերժվեցին հասարակության կողմից»:
Այն կարծիքը, թե Հովհաննես Իգիթյանն ունի զրո ձայն, մեր զրուցակիցն անհեթեթ համարեց ու հիշեցրեց, որ ՀՀ-ում գոյություն ունի համամասնական և մեծամասնական ընտրակարգ: Ու տեղեկացրեց, որ իրեն հրավիրել են Իմ քայլը դաշինքի ցուցակում լինել համամասնական ընտրակարգով. «Ես համաձայնեցի և գտնում եմ, որ մեր ցուցակի մեջ ցանկացած մարդ խմբակային ձևով ստացել է 70 տոկոսից ավել ձայն: Սա է խորհրդարան ձևավորելու՝ Հայաստանի ձևը՝ համամասնական ցուցակով: Ես հպարտ եմ, որ մասն եմ կազմել և իմ կոլեգաների հետ ստացել եմ մեր հասարակության 70 տոկոսից ավելի վստահությունը, մնացած բոլոր մեկնաբանություններն ուղղակի անհեթեթ են: Կարդալով այս նյութը՝ ես տեսա, որ իմ՝ Հայաստանում երեսուն տարուց ավելի քաղաքական փորձից, եթե գտել են միայն դա, ուրեմն ես ճիշտ կյանք եմ վարել»:
Մեր դիտարկմանը՝ շատերն են կարծում, որ «Իմ քայլի» վարկանիշի հարցում հետընթաց կա, Հովհաննես Իգիթյանն այսպես արձագանքեց. «Ես չգիտեմ՝ ովքեր են այդպես կարծում, բայց կա մի մաս, որ ցանկալին ներկայացնում է որպես իրականություն: Քաղաքական ուժերի՝ վարկանիշի ճշգրիտ իմանալու մի ձև կա. ազատ ընտրություններն են: Այդ ժամանակ պարզ կլինի՝ որ քաղաքական ուժն ինչ ռեյտինգ ու վստահություն ունի: Մնացած այլ մոտեցումները չեմ կարծում, որ համապատասխան ճշտություն ունեն: Իմ քայլը դաշինքի որոշ պատգամավորների, այդ թվում ինձ վրա մեծ հարձակում է սկսվել ՀՀԿ –ի շուրջ գտնվող մարդկանց կողմից և իրենց կողմից վերահսկվող որոշ լրատվական միջոցներով՝ հատկապես այն ժամանակ, երբ մենք բավականին ակտիվ էինք ապօրինի գույքի օրենքը քննարկելիս և մեր կարծիքը հայտնելուց հետո: Ես ուղղակի կապում եմ իրենց նյարդայնացումն այս օրենքի հետ: Այս օրենքն ուղղված չէ որևէ կոնկրետ անձի ու քաղաքական անձի: Ինչքանով այս օրենքը վերահսկելու է նախկիններին, այդքան էլ ներկաներին: Ինչքան դա կվերաբերվի նախկիններին, այդքան ինձ ու իմ գործընկերներին: Այս տեսակետից մենք բոլորս նույն իրավական դաշտում ենք գտնվում՝ ամեն մեկս կաշխատենք այնպես, որ ցանկացած գույք ու գումար միշտ հիմնավորված լինի»:
Հարցին՝ իսկ ՀՀ ԱԺ-ում տեղի ունեցած ծեծկռտուքը չի՞ ստվերում «Իմ քայլը» խմբակցության գործունեությունը, Հովհաննես Իգիթյանը պատասխանեց. «Ծեծկռտուք բառը չէի օգտագործի. եղել է տհաճ կռիվ, որը համապատասխան է փողոցին, քան խորհրդարանին: Մենք պետք է հետևություններ անենք: Այդ բաներն ամոթ են մեզ համար. մենք ներողություն ենք խնդրել առաջին հերթին ժողովրդից: Պետք չէ ընդհանրացնել: Եղել են մի քանիսը, որ անզուսպ էին, եղել են մարդիկ, որոնք թեկուզ խոսքի ագրեսիվությամբ սադրել են, եղել են մարդիկ, որոնք չեն դիմացել, բայց պետք է դիմանային…մեծ մասը կռվի մասնակիցներին բաժանողներն էին, այլ ոչ թե խմբակային ծեծկռտուք էր դա: Մի քանիսն իրենց անզուսպ են պահել, ինչի մասին իրենք էլ են արտահայտվել, տհաճ էր երևում դրսից, բայց այնպես չէ, որ բոլոր այն մարդիկ, որոնք եղել են, իրար ծեծում էին: Հիմնականում փորձում էին հանգստացնել, հանդարտեցնել մարդկանց և իրավիճակը»:
Տաթև ՀԱՐՈՒԹՅՈՒՆՅԱՆ
