«Առավոտյան շրջայց եմ կատարել կենտրոնի մի քանի դեղատներում: Դիմակն արժի 220 դրամից մինչեւ 260 000 դրամ»,-ԱԺ նիստում այսօր հայտարարեց ԲՀԿ պատգամավոր Նաիրա Զոհրաբյանը:
Ինչպես հայտնել էինք, ԱԺ արտահերթ նիստում այսօր քննարկվում է կորոնավիրուսի տարածումը կանխելուն միտված օրինագիծը, որով արտակարգ դրության ժամանակ բաց տարածքներում դիմակ չունենալը կպատժվի 10 000 դրամով, իսկ փակ տարածքներում քաղաքացու դիմակ չկրելու համար տնտեսվարողները պատասխանատվության կենթարկվեն՝ 100-300 հազար դրամի չափով:
Ձեռնոցներն էլ, Նաիրա Զոհրաբյանի խոսքով, արժեն 60-100 դրամ. «Հարգելի կառավարություն, պետք չի ողջ պատասխանատվությունը գցել քաղաքացու վրա: Աղքատությունն ավելին է, քան պաշտոնապես է արձանագրված, բայց գոնե սոցիալապես անապահովներին տրամադրեք դիմակներ: Պատկերացնո՞ւմ եք, թե ինչ կլինի այս դիմակի վիճակը, եթե այն լվանանք: Ասում եք՝ կարող ենք տանն էլ դիմակ կարել, բայց դա արդյոք լուծելո՞ւ է խնդիրը: ՏՄՊՊՀ-ի գործառույթն է պարզել, թե ինչու են հիմա դեղատներում նման գերշահույթ ստանում: Դեղատներին դիմակ մատակարարողներն իրենց գերշահույթից պետք է հրաժարվե՞ն, թե՞ ոչ»:
Լուիզա ՍՈՒՔԻԱՍՅԱՆ
