Կառավարության նախաձեռնությամբ այսօր հրավիրվել է ՀՀ ԱԺ արտահերթ նիստ, որի օրակարգում ՀՀ վարչական իրավախախտումների մասին օրենքում փոփոխությունների օրինագիծն է՝ երկու ընթերցմամբ քննարկելու առաջարկով: Արդարադատության նախարարի տեղակալ Վահե Դանիելյանը զեկուցեց՝ հարցի հրատապությունը պայմանավորված է այն հանգամանքով, որ կորոնավիրուսի տարածման պայմաններում վարակվածների թվի ավելացումը կանխարգելիչ միջոցառումներ է ենթադրում՝ այդ թվում ազատ տեղաշարժի սահմանափակումներ. «Գործող իրավակարգավորումը բավարար չէ, հրատապ է համապատասխան պատասխանատվության միջոցի սահմանումը»:
Փոխնախարարը մանրամասնեց, որ վարչական իրավախախտումների մասին օրենքում փոփոխությունների համաձայն՝ առաջարկում են արտակարգ իրավիճակի պայմաններում ազատ տեղաշարժման պայմանները եւ պահանջները խախտելը պատժել տուգանքով՝ նվազագույն աշխատավարձի 10-ապատիկի չափով. «Օրենքն ուժի մեջ պետք է մտնի հրապարակման պահին: Ներկայումս գործող օրենքը վարչական պատասխանատվություն է սահմանում մեկուսացման պայմանները խախտելու եւ տեղաշարժի սահմանափակումները խախտելու համար՝ նվազագույն աշխատավարձի 100-250-ապատիկի չափով, բայց հիմա առկա սահմանափակումները, մեր կարծիքով, համադրելի չեն մեկուսացման պայմանների խախտման հետ՝ հաշվի առնելով հանրային վտանգավորությունը»:
Դանիելյանը շարունակեց. «Հետեւաբար, ազատ տեղաշարժման պահանջ/պայման խախտելու համար ավելի մեղմ պատժաչափ ենք առաջարկում՝ տասը հազար դրամի չափով: Խոսքը պարետի որոշմամբ սահմանված՝ բաց տարածքներում դիմակներ կրելու պահանջին է վերաբերում: Գործող օրենքով տուգանքը 100-250 000 դրամ է, հիմա առաջարկում ենք նման խախտման համար սահմանել տասը հազար դրամ տուգանք: Մայիսի 14-ի որոշմամբ՝ բաց տարածքներում դիմակ կրելը պարտադիր է, հետեւաբար, օրենքի այս փոփոխությունը վերաբերում է դրան: Ինչ վերաբերում է փակ տարածքներին, ապա գործող օրենքը նման պատասխանատվություն սահմանում է՝ տնտեսվարողները պատասխանատվության կենթարկվեն 100-300 հազար դրամի չափով: Այսինքն, փակ տարածքներում դիմակ կրելու համար պատասխանատու են տնտեսվարողները»:
Կարդացեք նաև
Լուիզա ՍՈՒՔԻԱՍՅԱՆ
