Վարչապետին հայհոյելու համար «Հեղափոխության պահապաններ»-ի կողմից ներողություն պահանջելու դեպքով քրեական գործը կարճվել է: Այս մասին «Հայկական ժամանակին» հայտնել էր քննչական կոմիտեի տեղեկատվության եւ հասարակայնության հետ կապերի բաժնի պետ Ռիմա Եգանյանը՝ պարզաբանելով, որ գործը կարճվել է տուժողի կողմից կասկածյալի հետ հաշտվելու հիմքով:
«Գյուղապետ» մականունով հայտնի երիտասարդը՝ Արամ Գեւորգյանը, Aravot.am-ի հետ զրույցում ասաց, որ ոչ մի հաշտություն չի էլ եղել. «Ոնց կարող եմ նրանց հետ կռվել կամ հաշտվել, ոչ եկել են, ասեն՝ արի բարիշենք, ոչ էլ որեւէ իրավապահ մարմնից են կանչել, ասել՝ եկեք, բարիշեք: Ինձ հազար տեղից կանչել են քննչական, գնացել, ասել եմ՝ բողոք չունեմ»:
Մեր զրուցակցի համոզմամբ, «Հեղափոխության պահապանները» հովանավորվում են վարչապետի կողմից ու անարդյունք էլ կլիներ նրանց արածի համար ինքը բողոք ներկայացներ. «Ուղղակի ես մի բան գիտեմ, եթե մի բան պետք է անես ու վերջում արդյունք չինի, իմաստը որն է իմ գնալ-գալու, բողոքելու: Էդ տղերքը վարչապետի հովանավորյալներն են»:
Արփինե ՍԻՄՈՆՅԱՆ
